紅館騷重現《美少女戰士》?　周慧敏好重視：用好特別嘅形式再現

「玉女掌門人」周慧敏入行30週年，早前宣布將於2018年1月26及27日於紅館舉行《一萬天荒愛未老　周慧敏30週年演唱會》。自2011年的25週年演唱會後，周慧敏已事隔6年沒開演唱會，所以26、27號的場次開售不久已被全數秒殺。有見反應熱烈，今日下午周慧敏舉行演唱會記招，正式宣布在1月28日加開一場，並於9月26日開售。

演唱會記招上，Vivian以一身白色連身裙現身。她表示今次的演唱會班底動用了不少友情牌，所以有一系列的行內朋友要多謝。首先是曾經一起合唱《愛得太遲》的古巨基，因為基仔今次為演唱會擔任總監，Vivian笑說：「成個演唱會佢咩都要睇晒，好大責任。所以我都要出動我嘅經理人，古太去幫手。我唔知佢哋兩公婆點傾，不過好開心最後可以成事。因為基仔由揀歌、編曲、服裝、舞台效果都要比意見。點解會搵佢去幫手呢？其實我從來都覺得佢係一個好creative嘅人嚟，要求亦非常高，最重要係佢了解我，如果啲嘢過到佢嗰關，我就好放心。」

最近Vivian頻頻亮相TVB節目《流行經典50年》，但遲遲也未與湯寶如、王馨平合唱《美少女戰士》，不少網民也相當期待她們三人有合體的一日。一再追問下，Vivian終於回應：「其實我早於個節目未出現之前，大概6月嘅時候我已經邀請咗Linda同Karen兩位做我今次呢個演唱會嘅嘉賓，而佢哋都好爽快答應咗我。我覺得《美少女戰士》係一個經典嚟嘅，我唔想隨便做咗佢，而係希望我團隊可以花啲時間，用一個特別嘅形式重現喺舞台上面。」至於問到以前《美少女戰士》那條裙是否亦會重現，她笑說：「大家唔好諗呢啲過咗去嘅嘢啦，今次我希望係一個升級版，可以再Cool啲、型啲。不過就要等基仔諗吓啦！」

Vivian的首本名曲《天荒愛未老》大家也應該不會陌生，而今次演唱會主題《一萬天荒愛未老》可能令不少樂迷摸不著頭腦，但她表示原來這個演唱會名稱也是有段故的：「呢個名係俞琤(商台前副主席)幫我改嘅，有一次我同佢講開我會開一個30週年演唱會，不過未有名。佢突然好快就改咗《一萬天荒愛未老》，我當時都唔識反應，因為我都唔知咩嚟。原來諗真啲，一萬天，即係三十年，我就覺得好浪漫好感動，返去同啲團隊講，個個都好鍾意，所以就用咗呢個名。」

至於演唱會的poster方面，原來是由林海峰操刀，Vivian分享了難忘的經歷：「我從未有機會試吓，咩都唔知、無得準備嘅情況下就去到Studio。呢個信任只係林海峰先比到我，嗰日我去到Studio都仲未知會點影，不過我同阿Jan同一代人，我一向睇佢嘅作品都好有品質保證。」看見Poster中，Vivian頭戴婚紗頭飾，手穿蓋掩指環，她表示很喜歡這個概念：「我諗有一種『那些年』嘅情懷啦，嗰種幸福係嚟自心中富有。」她更大爆原來林海峰相當喜歡《大時代》，甚至把劇集翻看了十幾次：「佢嗰日影影吓相同我講『慳妹，你咪當方展博約你去街囉。』原來又真係幾有慳妹嘅感覺。」