【一首歌】Twins《女人味》　「女人的身份這樣美　不再兒嬉」

同一班朋友去K房唱歌嗌下發洩下絕對係一流嘅減壓方法，事關日日返工做嘢做到暈，又要俾人當small potato講咩都冇人理俾人當透明，點都要搵方法刷下存在感嘅！約埋三五知己走入K房當自己係主角，點唱點跳都一定有觀眾有反應，彷彿置身紅館開四面台。

相信好多人都會跟住MV跳舞，Chok晒樣咁唱K，而Twins嘅《女人味》簡直係首選！首先個音樂底已經夠「Un」，歌詞仲要講到看輕愛情，又要將男人玩弄在股掌之中，成為一個「高階玩家」，成件事真係一個字「型」呀！無論你平日生活如何被壓搾，如何被無視，只要咁樣型番晚條氣都順番晒！唔單止女生唱先減壓，男生唱一樣得，扮Twins扭動蛇腰，扮下女仔聲唱歌，笑下又一晚都幾過癮㗎！

可能係你會覺得「唓！玩完又點啫，第二日返工咪又係做奴隸！」，雖然你暫時改變唔到個環境，但都要搵個方法俾自己回氣再捱過㗎嘛！