Hit 爆「迷你K房」打唔入香港？ 內地搞手：地產霸權係元凶
「其實毒X一個更開心，使X你講……」相信唔少人都會得閒發口痕唱兩口，但係一個人喺街行緊好難無啦啦大聲開口唱㗎嘛，事關毒男就最忌有自信。不過，近日內地興起「迷你K房」，啱晒一眾有靚聲又怕對人表演嘅朋友啦！
「迷你K房」於內地成為新潮流，在不同商場都「總有一間喺左近」，而且收費唔算貴，所以都吸引到不少客源。既然內地「迷你K房」開到成行成市，引入香港又行唔行得通呢？但係衛生問題係唔少人關注嘅地方，而且歌曲選擇又會否被「河蟹」？
「約暢」的策劃人之一陳少寶接受《香港01》訪問時，被問到既然「迷你K房」勢頭強勁，會否引入香港？他慨嘆：「香港好冇機會做新嘢，太過資源缺乏，而且香港唔會俾『栽培期』新興行業！」佢又話：「同香港一啲公司傾過，但係反應唔熱烈，因為香港個問題太寸金尺土，租金問題係元凶，香港係地產霸權冇計！」
陳少寶又表示：「同香港商場傾佢又當你開間鋪咁計鋪租，而且部機(迷你K房)設計樓底比較高，都幾佔空間，好難做！」
內地營運「迷你K房」的門檻相對較低，於戲院、食肆附附近、甚至機場內都可見，但令人聯想到衛生的問題，始終耳筒、支咪都是「公家嘢」，由誰來負責清潔消毒？陳少寶表示：「同內地商場合作會俾清潔費，叫當地商場清潔人員搞衛生，類似資源共享咁。」雖然話會有人負責清潔，但清潔頻率有多密，如何監管不同商場的清潔是否做足，相信要鞏固顧客的信心仍然是營運商的首要考慮。
除了衛生問題，歌曲選擇與版權問題都是大家關心的地方，陳少寶透露：「大陸依家都要搞版權，版權費好似衝鋒車咁向前行；揀歌方面喺內地好簡單㗎啫，大家都好清楚啦。」
如果真係會去「唱獨K」，你會揀邊個歌手先？
雖然由內地引入香港較難，但會否怕現時香港K房的公司會「偷橋」？陳少寶則不擔心：「老實講，如果我做得起，都預咗有人跟；其實最緊要你樣嘢有人接受，唔會話怕做爛市，到多人做嘅時候就係鬥品質。」
陳少寶又透露，他有份策劃的「約暢」現時集中於廣洲和上海兩地營運，並有別於其他「迷你K房」的品牌，不只讓顧客打發時間，更將設置網上平台讓用家與網紅互動交流，甚至由網上世界走到現實相約唱K。而且，「約暢」其實去年已舉辦過一屆《我是直播歌手》比賽，讓素人也有曝光以及走到主流舞台的機會，而本年亦會繼續舉辦，並且會舉行「地面海選」由專業評判評分。其實內地早已流行直播並舉行各式活動配合宣傳等等，雖然以往有「17」、「voov」等直播平台，但反應也不算熱烈，即使到近期才流行Big Big Channel也像慢半拍。
不過話說回來，真係有個迷你k房，香港人又敢唔敢唱先？