【專訪】34歲林聞恩堅持10年先有歌：可能會有人覺得我靠妹妹幫
林聞恩這個名字大家未必很熟悉，但看到相片後便想起「哦！佢做主持㗎嘛！」雖然現時林聞恩工作主要是當主持，但其實她也是一位歌手，2007年參加英皇新秀時更是海選票王，同屆參賽者有在ViuTV藝人駱振偉及英皇歌手洪杰（原名扈佳榮）等等。34歲的林聞恩堅持了10年，終於有第一首自己歌——《看不見的存在》。這10年她是如何走過，家人、丈夫是如何支持她的音樂路？
大家可能在電視上見過林聞恩當主持，但其實她也是一名歌手。
堅持十年
10年前參加新秀，10年後才成為「新人」有自己作品，林聞恩臉帶笑容：「好開心！好難以形容，等咗咁耐終於嚟到，有少少唔現實嘅感覺！仲會覺得『係咪真㗎！』估唔到係自己屋企人都有大力嘅支持，因為我妹妹(林熹瞳)開咗間公司，促成咗呢件事，好多謝佢！」《看不見的存在》是電影《我老婆未結婚》的主題曲，由林聞恩妹妹林熹彤有份的公司投資拍攝，林熹彤除了擔任編劇及女主角，更讓家姐主唱電影主題曲一圓歌手夢。
林聞恩認為《看不見的存在》歌曲內容不單配合電影主題，更像是在寫她與音樂的關係，所以非常有共鳴。雖然有兩年時間曾離開娛樂圈，亦有想過放棄，但林聞恩認為那兩年時間讓她能反省自己，尋回純粹享受玩音樂的感覺。
「海選票王」卻做主持工作，懷才不遇？
林聞恩回想起當時勝出新秀的心情：「聽到當時經理人提過話呢個女仔入到嚟應該都可以出道㗎喇，我以為自己一簽就可以出道啦！可惜，可能真係因為我第一次接觸呢行，而且我本身個人比較內儉。」林聞恩又講到自己當初有點不知所措：「以前真係好少主動去同人傾偈，入咗娛樂圈之後，你好需要去表現自己，要有嗰個自信心，我突然間好似唔知自己要做乜。人哋會覺得點解比賽時好charm，但相處落就會覺得呢個人好冇自信，就會覺得未住，等下先。」
就這樣一等就3年，林聞恩也曾質疑自己的能力，不過最都能撐過去。被問到大部份時間都在做主持是否工作懷才不遇時，她樂觀面對：「唔會呀！我初時離開娛樂圈嘅原因就係因為，我以為自己係咪淨係做主持呢，冇得唱歌呢，咁就走咗。諗番嗰兩年離開咗呢個圈，其實唔係咁樣嘅，係一個trainning，因為我要習慣呢個圈嘅生活，明白我唔係淨係匿埋音樂嗰邊，我要知道點樣同大家交流。我要本身enjoy喺呢個圈嘅生態，我要知道點樣令自己個保持最佳狀態。」
幸得家人支持
林聞恩能有自己的作品，多得妹妹林熹彤幫忙，未來更會為她製作更多歌曲，但會否擔心外界將兩姊妹比較？林聞恩大方回應：「我自己唔介意，好開心我哋一齊喺呢行入面，可以互相扶持。可能會有人覺得我靠妹妹幫，但我呢樣嘢好細個就克服咗，事業唔會互相比較，只會希望對方好。覺得妹妹叻過我，會引以為榮！如果有人講我個妹，我會話『好呀！讚得好呀！』」
另外，林聞恩表示自己放假仲忙過開工，因為假日要練歌、夾Band等等，幸好老公都非常包容。而聞恩提起老公時面上泛起甜絲絲的笑容：「老公好錫我，好就我，唔會反對我做任何嘢！不過依家有少少……因為我由朝到黑都做緊第啲嘢，見到面都唔係同佢傾緊偈，唔好怪我呀！」聞恩又講到:「最近佢會覺得『你都唔使理我㗎啦』，唯有返去ｏ氹番佢。不過應該都唔會有危機嘅，因為我哋都咁多年，我都諗緊辦法，點樣o氹番佢！哈哈！」