【獨家專訪】MC Jin太多英文是原罪？　rap神：唔應該被語言框住

最近內地節目《中國有嘻哈》引伸出網絡上的不少討論，特別在MC Jin身上。有人認為他回流美國是一件可惜的事，也有人認為他留在香港才是真真正正的浪費。網上每個人也是評論員，流言蜚語雖多，卻沒有人真正了解過MC Jin的想法。

身在北京的MC Jin 接受《香港01》獨家訪問時表示，過去數年能夠看著兒子成長賺少一點都值得：「唔經唔覺阿仔（Chance）已經5歲。我哋喺美國生活非常開心。我覺得美國同香港嘅生活分別好大，喺美國生活雖然工作量少咗，但係我都有做音樂，而且同時又可以照顧家人，收入少過香港時期，但一切都係值得。相反以前喺香港嘅life style真係好忙，工作一單接一單唔會停。」

問到當時在香港工作的辛酸，MC Jin直言，他的際遇相比起其他香港rapper好得多：「我喺香港工作嘅時候太順利啦，可以做音樂、演員。有follow我嘅人都知我喺香港工作嘅時候除咗可以見證自己嘅成績、成長，最緊要係找尋到我嘅信仰。我真係估唔到我嚟到香港會搵到我嘅信仰。」

MC Jin 最近在兩岸三地爆紅，問到他是否有意在內地發展，他表示見步行步：「我當初去香港都只係諗住逗留短時間，點知有一個月變咗兩個月，兩個月變成三個月，最後變咗四年。其實我一直都係見步行步，由上天安排。所以去內地發展我都只係見步行步，每一個決定以family為先，會問太太意見，亦會考慮仔仔成長。」

最近在香港甚至內地都有不少網友支持MC Jin，有些人更當他是Hip Hop神，對於種種讚賞，MC Jin謙稱：「其實大家越叫我係神，我只會覺得自己越平凡，越要冷靜，好似我喺香港出嘅第一隻碟《ABC》入面嘅《人氣急升》嘅歌詞「人氣急升，大家冷靜」其實我做到嘅嘢，你同我一樣有咁嘅條件。我好感謝大家對我嘅支持，係一種動力！」

談到《中國有嘻哈》節目內的神秘人HIP HOP MAN雖然到現時為止還未揭開真面目（相信大家心裏有數），問到MC Jin 本人對於HIP HOP MAN有何評價，他笑言非常欣賞HIP HOP MAN：「我都有關注HIP HOP MAN，好佩服佢！雖然佢國語唔好，但睇得出佢對Hip Hop好有熱誠，而且好欣賞佢嘅國語rap。我睇得出佢想了解中國的Rap，而且敢於挑戰自己，期待HIP HOP MAN嚟緊嘅演出！」

問到MC Jin 有傳HIP HOP MAN會因英文過多而被踢走，有網友狠批節目做法不公，MC Jin似乎不同意：「無錯！rap係源自黑人文化，但呢個文化已經發揚光大，全球普及，所以每個國家都有自己嘅rapper，佢哋都有自己嘅語言。其實rap唔應該被語言框住，唔用英文唔代表發揮唔到。其實最重要都係要睇個創作人（rapper）同聽眾，起碼要聽眾明白你嘅詞先會有所感受。」