Kolor開騷盧巧音玩埋一份 黃貫中：睇完今晚唔使睇Metallica！
《Yes Rock 大混戰音樂節》絕對唔係講笑，真係如Kolor主音所講：「小心揈甩頭!」而且樂隊成員都攜眷席，除了朱茵現身支持黃貫中外，盧巧音亦有出席，更走到台上一齊玩番晚;鍾舒淇亦有到場支持結他手男友阿韜。
黃貫中率領樂隊Kolor、秋紅、Cassette「震散九展」，喚醒一眾餓show良久的搖滾樂迷，全場接近爆滿而大部份觀眾都一齊跳一齊叫，全情投入這場搖滾盛事。秋紅除了《為人民服務》、《柒點壹》外，亦有唱《Mic Check》、《Flower》，等重型歌曲，完全唔畀樂迷條頸休息。秋紅瘋狂headbang後，突然鐵漢柔情與Kolor合奏《時差》，試想像結他手Andrew拿着7線結他彈抒情歌，實在是驚喜，加上樂迷營造一片手機燈海，非常浪漫。隨後Kolor演繹另一深情作品《過客》。
唱完《過客》後Kolor與Cassette主音合唱《願我能》，中段黃貫中突然現身彈Solo，其他樂隊成亦一齊聚集台上，開始「大混戰」。黃貫中向台下大叫：「你以為你哋好疊友呀？睇下我哋先啦！你以為你哋好rock呀？睇下我哋先啦！」隨即唱出《大英雄》。黃貫中慨嘆今年很多傳奇音樂人相繼離世，包括Prince、David Bowie等等。然後獻唱《Black Hole Sun》向今年5月逝世的美國樂隊Sound Garden主音Chris Cornell致敬，更惋惜說：「Chris Cornell we miss you so much」接着唱出《踩界》及《歲月無聲》兩首經典，大批觀眾走到台前黃貫中腳下，距離近得可伸手觸及黃貫中的結他。與Beyond緊密合作的詞人劉卓輝都有到場但未有上台。唱《永遠等待》時，黃貫中見觀眾反應稍靜了下來便大叫：「你哋叫後生仔呀？我五十幾歲喇！」
全晚高潮要數，一眾樂隊翻唱90年代搖滾經典，先是美國重金屬班霸Metallica的《Enter Sandman》，黃貫中更揚言：「睇完今晚唔使睇Metallica！」羅斌走到台前彈Solo霸氣盡現。然後一眾Band友上台，連盧巧音都上台玩埋一份。夠打幾枱麻雀咁多人一齊玩「搖滾校歌」Nirvana的《Smell Like Teen Spirit》，將全場氣氛出到頂點，簡直感受到九展「地震」。一片狂熱氣氛過後，眾人壓軸唱出《無得比》，黃貫中，秋紅的Andrew，阿韜輪住彈Solo，其他成員更跪拜各位「結他英雄」，為近年難得一遇的搖滾盛事畫上精彩的句號。