【任噏樂評】神級MC Jin都要拍師奶劇　返香港可能係佢最錯決定！

最近內地節目《中國有嘻哈》突然讓Hip Hop在中國各地火了起來，節目中出現了不少知名的人氣Rapper，表現實在令人眼前一亮，不過讓香港觀眾產生最大反應的，莫過於Hip Hop Man嘻哈俠這一號神秘人物。雖然戴著面具也認得他是MC Jin，但的的確確比起以前在香港發展的時期，這陣子的歐陽靖的形象更似是一位英雄，但原因並不是他的技術和表現比以前好，只是他的才華終於有機會讓更多人看到。

提起MC Jin，大家最有印象仍是2002年MC Jin喺美國完美擊敗了不少黑人Rapper，連續7個星期獲得「Freestyle Friday」環節冠軍，Rap出一句「你返屋企啦」真係聽到都激動到打冷震，所以連吳亦凡見到佢嘅時候都唔敢問「你有Freestyle嗎？」

不過問題就嚟啦，除咗佢N年前Rap贏黑人為香港人同廣東話爭光外，到底大家仲記得佢啲乜？2003年佢開始喺美國拍戲，專輯又上埋Billboard，事業順風順水，但偏偏喺2008年決定回流「同聲同氣」嘅香港發展，但係直到而家大家都淨係記得一句「ABC係我係我　橫睇點睇都係我」，仲要落井下石笑佢廣東話Rap得唔好。在於外人看來，返香港可能係佢人生中一個最錯嘅決定，一個令人戥佢唔抵嘅決定。

呢條MC Jin Rap贏黑人嘅片段，無論隔幾多年都係咁好睇！

回港後，每年佢都會做一張Mixtape，但一年比一年少人支持，後來佢去咗TVB，不過並唔係因為TVB賞識佢嘅音樂才華，而係安排佢去拍劇，最威風嗰次就係喺《潛行狙擊》入面飾演「蠟青」，仲比佢攞埋當年《萬千星輝頒獎典禮》嘅「飛躍進步男藝員」！呢一個獎項就巴閉啦！仲叻過佢喺香港樂壇上嘅成績，因為佢都只係攞過「叱咤十大」嘅第六位同「新城勁爆Hip Hop歌手」呢類豬肉獎。對於一個Hip Hop歌手嚟講，呢個情景真係令人情何以堪？

講返而家就真係今時唔同往日啦！一個《中國有嘻哈》節目，令香港人突然醒覺，係喎！香港有一個Hip Hop之星歐陽靖喎！「喂！同我打殘班內地Rapper！」「吳亦凡行開啦！我哋香港嘅MC Jin rap贏黑人嘅時候你都唔知係邊。」嘩一個二個突然好似由細睇住個仔大咁，同啲怪獸家長衝出嚟周圍同人講「我個仔最叻！」無乜分別，真係唔該晒！啱嘅，有水又點能夠唔抽呢？「雖然我真係無乜聽過MC Jin嘅作品，不過個Friend Share咗條佢Rap贏黑人嘅片比我睇，喂真係好勁囉！」問心嗰句，其實佢嘅Hip Hop作品你又聽過幾多，有無比錢買碟支持過？你可能會話：「Hip Hop嘢我聽唔慣喎。」不過佢同陳奐仁出咗隻比較容易入口嘅《買一送一》你又有無嘗試過聽一次？

可能到而家都會有人話：「最衰TVB啦，好哋哋一個Rapper搞到佢變咗演員！兩頭唔到岸！」而事實上係，如果冇TVB捉佢去拍劇，佢可能喺香港人心目中連半點痕跡都留不下。起碼拍完劇，的確令到有華人嘅地方都會有人認得佢。反而香港人嘅習性就好特別，之前佢做廣東歌，大家就話想聽佢英文Rap，到佢而家離開香港一段時間，又話好想聽佢嘅廣東歌。甚至最近喺內地節目出現，大家就好似投機買大細咁希望佢為廣東話爭返口氣，Well…到底呢種貪新鮮嘅心態害死咗幾多有實力嘅歌手？