【任噏樂評】VR睇五月天演唱會好無聊　現場感用錢都買唔到呀！

「睇演唱會，識睇一定係睇Live！」相信好多人都會認同。無論咩風格嘅演唱會都好，親身感受現場氣氛先係享受。不過世事又豈能盡如人意呢，每個睇唔到Live嘅人都總有苦衷。

今時今日科技發達，睇唔到Live？唔緊要，有VR直播吖嘛！就好似上年12月王菲於上海舉行《幻樂一場》演唱會咁，門票最貴去到7,800蚊人仔，就算最平都要1,800人仔，就算有心都未必「有力」去睇。當時謝霆鋒出任大中華區業務主席的「數字王國」(547)，提供VR直播服務，收費都係30蚊人仔；就連當時霆鋒都係一邊食飯一邊用VR直播睇阿菲開騷。

而「數字王國」噚日舉行發佈會，將繼續發展VR技術，並直播李榮浩今年9月及五月天2018年嘅演唱會。

你諗下，畀30蚊人仔就可以置身王菲上海演唱會，仲要同霆鋒「咁高咁大」一齊用VR睇騷，抵晒啦！

VR直播的確可以打破地域限制，又可以解決一飛難求嘅問題，而且收費又唔費；不過真係冇feel囉！就算我畀番VIP票價，你點都畀唔到現場氣氛我。

講到口水都乾，睇騷緊係食氣氛㗎啦！如果唔係我同睇YouTube有咩分別啫？其他嘢唔講，淨係講畀現場嘅低音打到成個人震晒都抵啦！而且去到現場全部觀眾好自然就連成一體，一齊跟Beat跳、跟住唱，而且我係同偶像喺同一個場地，佢每一句說話都好似只係對我講咁。呢種臨場感，點會係透過一個眼罩戴住耳筒感受到，唔通我戴住個眼罩喺屋企跳咩？

再者，如果VR直播不設重溫，咁啱撞正返工行唔開嘅朋友就陰功豬喇，真係只可以睇DVD。

除咗心理上覺得唔好受，技術上亦有所限制。有內地網民喺上年12月畀咗30蚊人仔，體驗一下VR直播王菲演唱會，發覺「聲音畫面都有問題」。就算鏡頭set得再近，王菲個樣都好似打咗格咁，睇番普通720p畫質都冇咁嬲。

就算用作直播嘅VR鏡頭能夠拍攝4K影像，但用家未必有顯示到4K嘅裝置；就算有，網絡速度亦會影響畫質。除咗畫質，話明係演唱會就梗係要聽聲啦。

現場收音，靠現場sound man去mix，之後透過網絡，經過手機，再喺耳筒出，隔咁多層點都會打啲折扣。都未計你用咩價位嘅耳筒去聽。

又再講，如果為咗用VR睇演唱會時，有靚畫靚聲同臨場感，而大灑金錢去買器材，我不如用呢筆錢睇十次騷好過啦。戴眼罩睇點都係虛擬，用腳行入現場先係實境呀！