【任噏樂評】譚順生專輯唱k質素都收$129 唱腔老套似上世紀產物
譚順生近期是非纏身，人格及操守備受質疑，但畢竟佢都係一個歌唱老師，又係歌手，仲要今個月中先出完碟。如果因為人格而抹殺佢嘅努力好似有啲唔公平，所以我決定買佢隻碟，聽下自稱「超過10萬小時教學經驗」嘅佢到底咩嘢葫蘆賣咩藥！
我都未試過買碟買得咁心虛，行緊去CD鋪途中我不斷喺到諗，話晒自己都係一個後生仔，如果個店員問起我「點解會聽譚順生嘅？」，都唔知點答先甩到身，唔通我同佢講「公司叫㗎」咩，所以我心入面做咗個決定，佢一問我，我就話買嚟孝敬長輩。
行到入CD舖，咦！譚順生呢？我望勻幾個「New Release」碟架都搵唔到佢隻《想到舊年》，明明譚順生之前喺記者會話隻碟排第二㗎，應該好當眼㗎喎！唔怪得啦，個榜係hmv嘅，有時都真係唔明各大CD舖嘅榜單係點計，Anyway呢樣遲吓再同大家考究。
唉……死就死啦，頂硬上問店員有冇譚順生隻碟，個店員一聽到我要搵譚順生隻碟，佢呆一呆，之後托一下眼鏡上下打量我，再話：「Er…」，見佢個樣咁為難，唔通呢隻碟真係好賣到差唔多斷市？不過佢跟手就帶我去男歌手嗰欄度搵，就連個店員都要搵咗幾行先搵到譚順生隻碟，攞上手一望，129蚊？好似有啲貴喎！不過為咗聽Dr. Steve嘅靚聲，呢鋪點都要焗畀，等找錢期間我見到個店員尷尷尬尬咁陰陰咀笑，可能係我自己心虛啦，步出CD鋪我嗰陣仲想搵本雜誌包實佢，費事俾人見到會一手搶走。
《想到舊年》CD全面睇
折騰一輪終於返到公司，心肝仔怦怦跳，即刻播碟！譚順生不嬲以台風出眾見稱，你睇佢喺YouTube對住鏡頭唱都會手舞足蹈就知啦，今次佢出碟擔正，仲唔爆seed？識睇一定係睇MV順手聽埋歌！老老實實，佢出9首歌，首首都有MV，仲要去9個唔同地方，仲要有live band傍住喎！你估譚詠麟出碟咩？以HiFi發燒碟嚟計，佢都算落重本拍MV囉，唔知遲吓又會唔會出埋黑膠呢？
譚順生啲表情真係世界級，感情十足，睇佢唱主打歌《明日話今天》就知。未入第一個副歌就已經表情多多，時而閉眼，時而佻望遠方，彷彿滿胸豪情熱血要在頃刻間爆發，可想而知之後副歌有幾氣勢磅礡。
言歸正傳，譚順生今次身份係歌手，當然要講返把聲。譚順生把聲本身就沙沙地，一入咪簡直就係倍大佢呢個「特質」，聽落去把聲唔夠開揚；俾人一種佢不斷擠壓喉嚨唱歌嘅感覺。亦由於過份擠壓，太多聲帶拍打嘅聲音，雖然可以話係有特色，但係唔悅耳。唔係音準有問題，而係呢個Tone未必個個接受到，可能有人聽多兩首會覺得吵耳㖭。
簡單講就係「摙」住把聲咁唱，好多喉嚨聲，聽完都覺得自己喉嚨有啲痛。
不同歌曲演繹方法都不同，話唔定轉首柔情啲嘅《戀愛預告》會好啲呢？點知一樣係咁多喉嚨聲，令人難以投入歌曲甜蜜的氣氛，更會自動聯想到譚順生肉緊嘅表情。再者，某啲尾音用氣音去唱，而且音量急降hold唔住，實在分唔清唔到呢啲叫「有感情」定係「冇氣上」。講多次，真係唔關音準事，老老實實唱咗咁多年，又開班教學生，家陣仲要出碟，就算有問題都執走咗啦。
但係個唱腔，個Tone真係唔悅耳，好似一路聽一路有沙紙磨緊你咁。好哋哋陳百強嘅《戀愛預告》唱到好似《戀愛訃告》咁，真係令人愕然。唯有係拎返陳百強嘅《深愛著你》出嚟聽聽，回下血先可以繼續聽落去。
回完血，聽埋其他歌，發覺都係同一個問題，個Tone真係難以接受，聽得耐真係好拮耳，而且戥佢辛苦。講真㗎，真係好想同佢講句「放鬆啲啦香港人」。依家討論區都好興打「勇者塔」，上文我都介紹咗兩首歌，仲有埋MV截圖睇，相信各位都好想知佢仲有咩絕招。有興趣嘅「勇者」就打埋個塔佢啦！而買咗碟嘅朋友，祝福你！
譚順生表情包！(按圖放大)