《拆彈專家》fb公關災難　導演邱禮濤開腔：多謝入場歡迎批評

「拆彈唔係你想做就做，要個天批准」，由劉德華監製及主演的《拆彈專家》，前日（20日）上映，但影評好壞參半。
電影官方facebook管理員（小編）指留下負評的人是「打手」，更指是「咁樣講係咪侮辱咗製作人一番苦心」，被網民批評是公審用家留言，「只可以讚！不可以彈」，引發公關災難。

網民在HK Movie留言：終極垃圾　拆彈專家fb反擊

港產大片《拆彈專家》斥資億元製作，以搭建紅隧爆炸場景做賣點。首映當日錄得110萬票房，成績不俗，但在大型電影評論網HK Movie僅得3粒半星（滿分5粒星），3.8評分，並引來多則負面評論，有網民指「睇到想講粗口」，亦有人指僅僅值兩分「係畀紅隧製作團隊，場景無令人失望」狠批「劇本太爛」，名大於實。

拆彈專家fb昨日（21日）主動「拆彈」，在官方facebook張貼負評截圖，並指「有打手，不過係打我哋D手！老實講一套戲唔會十全十美，但係咁樣講係咪侮辱咗製作人一番苦心」，然而其留言卻惹來網民狠批「就算幾好睇拎幾多獎嘅戲都會畀人話，你係咪個個負評都要cap出嚟公審？」，又指「見到咁嘅公關都唔想睇」。

導演邱禮濤：拍戲唔畀人話得嘅，就唔好拍戲

《拆彈專家》導演邱禮濤回應《香港01》時指，「我本身冇玩facebook，都係尋晚有人畀我睇先知」，又指官方fb是宣傳公司的工作，自己沒參與，他認為「拍戲唔畀人話得嘅，就唔好拍戲，睇得我部戲，我感謝都嚟唔切，歡迎批評」。

邱禮濤坦言自己「面皮好厚，支持言論自由」，又指「就算係全世界最好嘅戲，都會有人批評」，他表示不認同fb「咁樣批評返人咃，做得唔啱」。

拆彈專家官方fb小編於今日凌晨向網民道歉，「對這個post造成大家的不舒服，反省了自己的言詞真的過火了，我在此道歉」，又指無論正面或負面的評論，應以開放態度接受。

說到網絡打手，其實是主要在各討論區、社交網站等眾多網民聚集的地方，以個人評論方式對某公司作出宣傳或攻擊，製造輿論。在大型影評、食評網站尤其常見，旨在藉着批評言論，貶低對手，又或者盛讚提供利益的一方。因為是隨意評論平台，一般是無法證實誰是「打手」，只能靠評論是否中肯、合理或無理取鬧來分辨是否值得相信該言論。

打手初入行薪酬可達2萬　不用OT？

有人聲稱曾任職4年網絡打手，去年在討論區發帖「你問我答」，回應網民時指打手一職很少對外招聘，靠熟人帶入行較多，因為怕客戶資料外洩。「唱好個客，唱衰個客，競爭對手都會做，但後者容易做到反應，因為香港人見到小小嘢唔滿意就X（鬧）埋一份。更指初入行的薪酬也可達2萬元，不用OT（超時工作）彈性工作時間。