爸爸快測呈陽性在家隔離　好友問「點解你仲未中」　港女怒斥黐線

說話不留神，隨時得罪人！有網民在討論區上分享，指爸爸近日快速測試結果呈陽性，於是立即在家中將他隔離等待衞生署支援。有朋友得知事件後問樓主，「點解你仲未中？而家仲係1條線」，令她感到被冒犯，憤而直斥「你好想中咩？」，又叫對方上門吃飯，「可能返到屋企就中呢」。朋友解釋只是開玩笑，但樓主仍然不滿，質疑「到底呢啲嘢有咩好講笑？」。

「你哋有冇啲朋友講嘢都係咁衰？」樓主在香港討論區發文，指爸爸早前快速測試呈陽性，於是立即與媽媽將爸爸隔離在房內，「因為可以做嘅嘢已經做晒，而家只可以等衞生署之類」。

爸爸病發後發燒足足1晚，樓主與媽媽均感到擔心，直至翌日早上有朋友問候，於是她就向對方分享情況。沒料好友竟然問樓主：「點解你仲未中？而家仲係1條線？」樓主當下感到不快，於是反擊指：「你好想中咩？咁你上嚟我屋企囉，而家有個確診呀，一齊食個飯可能返到屋企就中呢。」朋友聞言批評樓主：「咁小氣，講下笑都唔得。」樓主依然不滿，怒斥：「到底呢啲嘢有咩好講笑？冇事都想病咁特別？唔通就係為咗唔使返工所以整病自己都冇問題？到底係咪黐線？」

普遍網民都認為樓主的朋友有問題，「擺明串緊你，豬朋狗友你仲同佢做朋友你都唔正常」、「把口好衰」、「有啲人把口唔好乜都噏得出嚟」、「當佢表達能力差囉」。不過亦有網民認為朋友是無心之失，「佢可能只係一時口快啫，唔好咁上心啦」，又指樓主如大部分香港人一樣，「無乜幽默感」。

（香港討論區）