酒樓要求員工將獲派利是交出　經理：間間都係咁，係行規

若果要你將新年收到的利是跟兄弟姊妹平分，你會想反枱還是笑呵呵？近日有網民上載照片，指有一間酒樓要求將收到的利是交給公司，作員工福利金之用。照片引來網民激烈迴響，不少網民直指公司有問題，批評酒樓小器。
涉事酒樓回覆《香港01》時表示，初十開始收到的利是才要交出，認為這是行規。
惟添好運老闆麥桂培則表示，從無聽過此做法。

有網民在「24小時膠通消息報導（膠Group@環球膠報）」facebook群組上載了一幀圖片，圖中是一間酒樓於2月3日貼出的執行通告，內容指出：

員工收到利是，收到二月五日。由二月六日星期一起，所有員工人客比利是一律交回公司作員工福利金用。各員工凡人客比（畀）利是，要在利是封上面寫上自己姓名，然後放入小賑箱，切勿私自袋起。違者第一次警告，再犯者即時解顧（僱）及不作任何補償。

涉事酒樓：不收員工初一至初九所得利是

《香港01》致電涉事的慶相逢喜讌酒樓，經理對於該通告直認不諱，惟他強調，員工在年初一至年初九收到的利是，可以「袋落袋」，但自年初十開始獲得的利是，則要交給公司當員工福利金，「因為呢啲係大家有份，新年過咗喇，如果冇利是嗰啲……咁樣招呼，係唔得㗎嘛酒樓。間間都係要咁㗎啦」。

至於員工福利金，經理就指是當儲夠一筆錢，便可以開大食會，「員工都係享用番」。而酒樓現時已收到逾數百封利是。惟未問及員工懲處問題，經理就稱太忙而收線。

添好運老闆：自古以來都係樓面收㗎啦

酒樓經理認為此做法是行規，不過添好運點心專門店老闆麥桂培就向《香港01》表示「梗係冇（這種行規）啦。自古以來都係樓面收㗎啦。我哋幾廿年前入行都係咁。廚房會分得好清楚，以前有人擺酒，畀夜廚利是咁咪廚房分囉」。任職酒樓師傅近40年的他說，或許個別酒樓會有自己的規矩，「但行規就肯定唔係」。

樓面過年收到啲利是，梗係樓面㗎啦，我從來都冇聽過會分啲畀你。冇㗎。

添好運又會不會收回員工利是？麥桂培連聲說無，「絕對冇。你收到咪你叻囉。你好笑容啲梗係收多啲㗎啦。正常畀封利是，點解要拎返出嚟。我都唔明。完全冇道理」。不過，他補充，樓面平日收到的貼士就一定會大家分。

周中：可能會公平啲

利是齊齊分，資深廚師周中回覆《香港01》時指出，有一些他曾任職的酒樓亦奉行這個政策，「可能會公平啲，每個都有，唔會話一個多一個少」。利是一年一次收取，他認為屬歡喜錢，「有啲客可能畀一個唔畀一個，唔係全部派晒，有啲咪好多，有啲咪冇。大家都有份做㗎嘛，大家都開心啫」。他亦曾受惠此政策，「（獲得利是錢）都有一千幾百」。但酒樓聲稱，若員工不交出利是，最嚴重可被解僱，周中就笑指：「呢啲都係嚇佢哋㗎啫。」

網民批評酒樓小器

惟有網民認為酒樓的政策不公平兼小器，「飲食業人工已經唔係高，過年利是都要打劫埋，而且客人係比（畀）酒樓嘅員工，又唔係比（畀）酒樓，良心去左（咗）邊」。但亦有人留言稱很多酒樓都有推行此政策，認為並非該酒樓的錯，「通常食肆咁樣咁樣做先可以分利是畀廚房佬/後勤 😂😂😂如果淨係得樓面先可以收利是廚房佬罷工都似🙈🙈」。也有人指出，該酒樓初十才開始收回員工獲得的利是，已經不算嚴苛，「佢係二月六曰之後收嘅利士（是）先要交出黎（嚟），講真六號都初十，仲邊有利士（是）收」。