【中女情人節】怕冇男人埋身？　40歲豬肉女刀神：離婚後仍有人追

中環豬肉檔「美女刀神」許穎欣（阿May），20多年前為父肩負豬肉生意，是別人眼中「孝順女」，事業上名利雙收，情場上離婚收場。
回復單身中女身份，穿梭於男性為主的鮮肉行業，阿May就如漆黑中的螢火蟲般出眾，她說：「我唔會靠人養活自己，離婚之後亦有朋友話想同我喺埋一齊。」

每日清晨時分，阿May忙於開店、交貨予酒家、應酬熟客、斬豬分豬等等，幾乎一腳踢。個子嬌小的她，倚傍豬肉枱，執起兩斤重的豬肉刀，不出數分鐘，就將豬殻解體，豬頭、豬髀分得乾淨俐落。香港「豬肉佬」見得多，「豬肉女」卻少見，加上阿May樂於教導街坊如何烹調豬肉，儘管身邊沒有一杯Dry Martini陪襯，依然博得客人盛讚：「肉靚，人都好靚！」

香港剩男剩女越來越多，以為「豬肉女」這名號會為情路增添障礙你就錯了。阿May一度找到終身伴侶，只可惜是「一度」。脫下手套，兩隻戒指現於人前，阿May笑說：「裝飾嚟㗎咋！婚戒除咗好耐啦！」今年要過單身情人節了？她直言：「宜家我個感情狀況係Zero嘅......有無啲靚仔可以介紹，哈哈！」

豬肉檔的浪漫邂逅

站在中環結志街，兩旁都是濕貨店，賣肉、賣菜、賣水果，一片吆喝叫賣聲，記者看不到擦出浪漫愛火花的可能性，阿May卻揮手說：「唔難㗎，好易識架咋（異性）我哋，可能接觸客多！」原來她和前夫正是在豬肉檔邂逅，當年前夫負責送肉，及後發現大家都喜歡養狗，漸漸走在一起。由拍拖至結婚，佔了阿May人生十年。

苦沖開了便淡　單身更自由

婚後的阿May，以為從此過着幸福愉快的童話式生活，豈料發現前夫有第三者，去年決定離婚。她憶述，當下猶如「個天冧落嚟」：「鬧完佢都冇悔改，覺得唔好勉強自己喇。」真愛難求，阿May經過1年才平復情傷，「（與前夫一起）覺得嘥左自己時間同精神，希望之後會帶眼識人囉！」畢竟自己已非「十八廿二」，家人亦為她焦急，屢勸她參加社交活動，但她卻無動於衷，反而豁達地說，享受自由單身生活，「我又唔會靠人養活自己，自己一個都OK」。

不擔心成「唏噓豬肉婆」

阿May向記者分享最近發生的趣事，有人偷偷將紙條放進其口袋，寫有電話及姓名。「幾搞笑呀，我唔知係咩人，我估佢想識我囉！」回復單身後，阿May身邊不乏追求者，自信地說：「只要我開聲就有人陪我！有朋友話想同我喺埋一齊。」但她對開展一段感情，已有保留，「唔會好似以前咁覺得OK就一齊，始終都係俾人傷害過」。

生意係你付出幾多，收成就會有幾多，成正比；感情係你控制唔到另一半，但回報或result唔係預期所擁有。

找一個肯陪你斬豬肉的男人？

自中五畢業後，阿May專心接手爸爸的豬肉檔生意，轉眼20多年，由昔日內向害羞的小女孩，變成豬肉檔老闆娘，並有6、7名店員相助。店員阿強讚賞阿May精明，但終日要困在小小的豬肉檔，替她感到可惜：「佢係會計師、精算師，做生意好叻，為咗爸爸咋，犧牲咗自己。」

「如果我唔喺呢度做，可能會識到更多人，感情都會豐富啲！」身邊人多認為，阿May值得擁有更好，她自己也有幻想過，但回心一想，斬豬肉也有得着，如學成刀法，才磨煉出剛強個性，感情遇上挫折，也不至於一倒不起，「（做豬肉檔）有人認同自己會好開心，覺得我哋女士唔一定係纖巧或者好懦弱，巾幗不讓鬚眉！」

對豬肉部位瞭如指掌的她，形容自己如同「脢肉」（上肩肉）。「夠百搭！蒸得炒得剁得，即係邊方面佢都OK！」她肯定，煮飯洗衫執屋難不倒她，而對於另一半的要求，最重要是真心。「有錢嘅（男人）我見過好多，但唔需要吓吓買名牌包包。」（需要一個肯陪你斬豬肉的男人嗎？）阿May卻搖頭說不用，她寧願另一半有更好的發展，免得斬豬肉至五勞七傷。

要活得比你好

情人節將近，阿May已表明當日如常工作。沒有情人相伴，她決心要更愛自己。「雖然我係40歲，但我覺得自己唔似，似30歲！」因有自信，所以美麗，阿May每星期都會到美容院做facial，花錢增長眼睫毛；至於化妝，她則耍手擰頭：「化妝都幾難，仲難過對住豬肉。」

初學切豬肉時，阿May不慎被刀切到左手中指，現時傷口附近已長肉癒合。對比手指的傷口與感情，她形容，後者如同「個心被拮了好多刀」，弄傷手指只是皮毛事。即使前夫最近主動聯絡她，希望重新來過，她把心一橫拒絕：「當一個人走咗先識得珍惜，就算啦！」

以前樣樣嘢以另一半為先，宜家我要多啲時間打扮自己，買多啲靚衫，更錫自己！

「美女刀神」非浪得虛名　不靠男人買鑽戒

剛過去的元宵佳節夜，香港豬肉行總商會舉行春茗，阿May當日盛裝打扮，在宴會中負責接待嘉賓。 換上黑色修身連衣裙、穿著高跟鞋、塗上紅色口唇，與平日在豬肉檔的她簡直判若兩人。在眾多男賓客的場合中，她更顯得明艷照人。

難得有打扮的機會，阿May出動鑽石戒指，配襯一襲黑色晚裝，更添貴氣。難道是追求者贈送？她急忙澄清：「自己買㗎！」其後才解釋，自己辛勞了20多年，5年前動用儲蓄，豪花7萬元，精心挑選1卡鑽石戒指獎勵自己，重要場合才會戴。她舉起手上的戒指，得意地說：「唔需要靠男人買，自己都可以自力更新！」