乘客收工搭巴士上車才驚覺無戴口罩 好心車長送私伙卡通口罩幫忙
於公共場所戴口罩是疫情下的「新常態」，但相信大家也有失手時。有網民分享好人好事經歷，指日前放工乘搭城巴回家，上車後才驚覺忘了戴口罩，更被另一乘客投訴。事主徬徨之際，車長竟送出一個私伙卡通口罩解決燃眉之急，令她感動又驚喜，直言「好想表揚」對方。城巴事後也於facebook專頁發文，找來該名好心何姓車長講述助人經過。
遇上好心車長的乘客上周四於fb群組「屯門公路塞車關注組」發文，指當晚匆匆忙忙收工時忘了戴口罩，直至登上962X班次並「嘟卡」後，一名女乘客向車長投訴，她才驚覺自己一直沒有戴口罩，「真係唔知唔覺，直至女士同司機講，我先諗返轉頭，唔怪得之嗰位女士排隊嗰陣係咁行開啲，仲係咁擰轉頭怪異地望住我」。
事主指當時身上沒有後備口罩，只好向車長提出落車才作打算，沒料獲對方暖心幫忙。事主形容車長「超好心又溫柔」，不斷翻找自己的隨身袋，拿出一個私伙口罩幫忙解窘，「好靚好實淨好厚」，令她非常驚喜，「好想表揚呢位城巴962X司機哥哥」。
不少網民看過帖文也大讚車長的熱心行為，「司機哥哥嘅舉動就係大愛囉」、「香港就係需要呢份人情味」。亦有網民認為投訴事主的女乘客反應過大，「與其投訴不如直接人間送暖，送個口罩畀你」、「有時真係呢啲好小事，自己講咪得囉！或者自己可以問人哋係咪需要」，而事主回覆時則表示：「咁我自己係有責任嘅，冇戴就係冇戴。而嗰位女士都冇錯嘅，同司機講都好正常嘅。」
城巴前日（9日）亦於fb專頁發文，找來事件中的好心人何車長講述助人經過。何車長憶述事發當日正下大雨，認為事主下車購買口罩會非常狼狽，故從袋內取出私伙卡通款式口罩送予對方。
帖文提到，何車長深明「無一罩傍身始終會好囉囉攣」，因此「諗都唔諗就私人送個口罩畀佢」。何車長更「調返轉頭多謝嗰位乘客畀個機會佢幫人」，認為人與人之間最重要是互相幫助，只要每人多走一步，社會就能連結起來。
同場加映：邊個話香港人冷漠？網民熱數陌生人暖心小動作▼▼▼
同場加映：婆婆拿3大袋重物迷路 2位中學生幫手拎仲送回家 網民：好有愛▼▼▼
同場加映：網民熱議設站極近巴士線 有啲距離不足100米 呢條走車都唔驚！▼▼▼
同場加映：巴士線有X、有P、講明特快都好慢？網民盤點「假特快巴士路線」！【點擊下圖放大即睇內容 ▼ ▼ ▼】
同場加映：網民嚴選「真特快巴士路線」 半個鐘元朗去旺角 呢區成快線贏家【點擊下圖放大即睇內容 ▼ ▼ ▼】