【城市廢墟】邵氏片場、戲院、學校鬧鬼？　攝影師：上香才按快門

走進廢墟，一切擺設也被定格於結束營運的那一秒，難以想像腳踏每一吋破碎磚瓦，曾是熙來攘往之地。「我哋入去唔係探險，是探索，想用相機留住歷史的真貌」。
廢墟攝影師Sing Chan，也是平面設計師，愛上廢墟攝影4年，曾走入逾半世紀歷史的邵氏片場，深入傳聞鬧鬼化妝間，赫見一代巨星傅聲遺照及香爐，「影相之前『裝咗炷香』先敢按下快門」。

曾探訪香港數以百計「廢墟」的Sing Chan，接受《香港01》訪問，當被問到有否遇過靈異的事，他強調「我都信有鬼，但有啲人專登將一啲唔屬於嗰個地方嘅歷史，古怪傳聞，無中生有嘅加插喺廢墟，我就好抗拒」。他用相機、訪談、翻查歷史的方法，「認清歷史，你就知道傳聞邊啲係真，邊啲係假」。

邵氏片場化妝間　有傅聲香爐

有「東方荷李活」美譽、1941年啟用的邵氏片場，以往出入的都是「粒粒巨星」，締造一代電影神話的夢工場，例如：李小龍、林黛，現已一片死寂，遍地亂石。曾走訪數次片場的Sing Chan，訪談間突然問記者，「識唔識一個打星『傅聲』」？

傅聲，70至80年代武打巨星，憑著《方世玉與胡惠乾》首當男主角，一炮而紅，演藝生涯如日方中，豈料1983年一次車禍斷送一生，享年28歲。

走入廢墟最驚的一次

Sing Chan繼續說，「有次入到一個化妝間，最尾嘅化妝枱，見到傅聲大頭相，相前有個香爐，香爐旁邊擺放用剩嘅香。」下意識想立即舉機，但「影之前上咗柱香，對著空氣講『如果你唔想我影呢張相，報夢畀我，我只係想留住片場呢刻嘅狀態。』」最後當然沒有收到任何「訊號」，這一次也算是Sing Chan口中最「驚」的一次。但可想而知，「傅聲備受尊重，而嗰個化妝位，可能就係佢專用」。

Sing Chan直言很喜歡這個地方：「呢度係電影嘅寶藏，除咗紀錄輝煌電影業之外，宜家裡面仲有好多電影海報、菲林、手抄劇本等，都好珍貴。」古物諮詢委員會去年9月，將邵氏片場、錄影廠、別墅等建築物的評級，整體維持為一級歷史建築，但評級並無法律的保障能力，片場能否保存，業主有最終決定權。其實業主復星國際於2014年底，曾獲城規會批准，將片場改建為住宅用地，可原址興建40幢、高4至9層的住宅，及兩幢宿舍。不過業主其後又撤回申請，與政府商討保育事宜。

秀茂坪金茂坪戲院是日軍刑場？

「呢間戲院荒廢10幾年，坊間好多不實傳聞，講到好恐怖。」Sing Chan表示，最重要是認清歷史，「網上話戲院在日佔時期是日軍的行刑場」，Sing Chan指，問過附近居住數十年的老街坊，也未聽過此事。

「有網民話秀茂坪1972及1976年兩次山泥傾瀉同戲院有關」，Sing Chan翻查資料肇事地點與戲院有段距離，該次雨災亦沒有波及戲院，「通通原因都好牽強」。網上又傳，「戲院廁所燒死過人」，但都沒有相關報道留有任何紀錄。金茂坪戲院早在60年代開業，為當時仍是秀茂坪邨徙置居民提供娛樂，但後來重建，於90年代結業，荒廢10多年而至今仍未有發展。

荒廢18年　元朗達德學校係亂葬崗？

3年前曾被《國家地理頻道》電視節目列為亞洲十大恐怖地點之一的達德學校，一直是「全港最猛鬼廢校」之首。

Sing Chan坦言，「是傳媒同坊間煲得太勁，真實都唔係咁」，坊間流傳日軍攻佔本港期間，元朗屏山村民被大規模殺害之後，日軍將屍體埋在小學山邊，成亂葬崗，導致小學周圍陰魂不散。Sing Chan則指，並無文獻資料記載達德係亂葬崗，一直都係大家以訛傳訛。

傳聞又指校內女廁，曾有一名校長穿紅衣自殺；加上學校荒廢18年，多人潛入「探險」，然後太驚而聲稱「撞鬼」，令到達德披上恐怖之名。至少曾到訪達德的Sing Chan坦言，「裡面唔恐怖」，他又指廢墟只是沒有人文活動，雜草叢生，加上一連串的坊間傳說，才會造就一個「鬼」地方，「但我們要做嘅係，睇吓事實又係唔係咁，唔好傳聞當真」。

Sing Chan指出，對廢墟的興趣，不是建基於「探險」，而係想將一代人嘅建築、文化用相片保留，「一旦呢啲地方拆咗，下一代都知面貌」。他又指，做到的事可能很少，但總算曾紀錄一個地方的歷史痕跡，箇中故事，已經值得。