自幼家貧習慣慳過頭 港女感自卑：窮會影響一世 總覺配不上伴侶
常說知識改變命運，能解決跨代貧窮，但現實上往往面臨許多挑戰。有女網民最近分享親身經歷，慨嘆「窮，真係會影響一世」。她指自幼在綜援家庭成長，讀小學時已感受到與同學之間家境不同，節儉變成習慣，長大後雖有收入，但仍然感到自卑和「慳過頭」，許多舊物都捨不得換，甚至有「襯唔起另一半」的想法。帖文引來網民討論，紛紛鼓勵樓主往好的一面想，「識慳錢何來係一件壞事呢，你識慳點都好過使錢大手大腳啦，係咪先」。
事主日前在Dcard討論區發帖，表示自己出生於貧窮家庭，就讀小學時家人需領取綜援，當時父親已退休，全家只有母親工作，「由好細個開始就知自己屋企無咩錢」，羨慕其他小朋友在假日能一家人出遊，並每年出國旅行。
她舉例指，第一次意識到自己家境與同學有差距是在小一，某天英文課內容與玩具有關，老師要求學生從家中帶玩具回校，「因為屋企窮無咩玩具，所以我淨係可以帶一隻好細同殘嘅膠公仔返去」，惟翌日發現所有同學都帶了「經過玩具反斗城先見到嘅玩具」，內心只有羨慕。
事主稱直至哥哥出社會工作，家中經濟情況才有改善，不過自己長大後「發現原來窮都真係幾大影響」，因她知道自己家境一般而感到自卑，覺得自己配不上另一半。她續指，自己有時也會很「小家」，例如寧願多走數間店舖格價，以省下「一蚊一毫」。她表示，即使一些必需品已變舊，有時亦不捨得更換，「好似眼鏡咁，戴咗差唔多兩年，塊鏡花咗、個框鬆咗都唔換，因為覺得仲睇得清」。
她坦言「有時我都覺得我慳過頭」，但無奈這些行為和想法已深深刻在內心，都是下意識影響下完成。不過，許多網民與事主想法不同，紛紛稱讚及鼓勵她「懂得節儉」，「其實慳係一件好事啊，總好過亂使錢，搵錢唔容易，有時候慳咗就當賺咗」、「識慳錢、度過格價過先買嘅習慣無壞，仲可以慳返唔買啲唔等使嘅嘢！」。
有網民就建議事主，既然已有工作和收入，應花些錢善待自己，「大個咗有啲位可以比自己舒服啲」、「錢係一定要使，使喺自己身上投資自己，先會有更加多嘅收入」、「慳唔一定係壞事，但太慳真係唔好，有能力絕對唔使唔捨得，可以對自己好啲，太過慳最後只係變咗寒酸」。
（Dcard）
同場加映：中產vs貧窮家庭｜連登仔「窮人不應生仔」惹熱論：貧窮永無法彌補
同場加映：全班得自己無搭過飛機 網民分享13個「發覺屋企好窮」時刻引共鳴