【聽力測試】叮噹電影有粗口？　配音：「佢哋走X咗呀」

網絡作家藍橘子一篇《我是技安，今天出席了大雄的葬禮》，打破一般人對叮噹劇情的框架，風頭一時無兩，再度掀起叮噹熱潮。
有網民在網上翻推一齣叮噹大電影「鞭屍」，指劇中的對白含有粗口，「認真聽咗十次，都聽到『走X咗』」，有大批網民紛紛留言都指，「毫無疑問係粗口」。

原對白（估計）：「走甩咗呀」

配音後（親耳聽）：「走X咗呀」

對白懷疑含有粗口的叮噹大電影《大雄的天方夜譚》，於1991年上映。相關劇情講述，叮噹、大雄一行人被鎖在囚室，後來有人出手相助，成功逃脫，被獄卒發現後大叫，「佢哋走X咗呀！」。根據劇情，估計原本對白應該是「走甩咗呀」，但配音後的版本則變成「走X咗呀」。

「聽10次笑10次」

網民聽後均認為對白的確是「粗口」，並指「好認真聽咗十次，都聽到『走撚咗』，係咪我有問題？」其他網民也一致認為「無聽錯，擺明係走X咗」，又有人指「聽10次笑10 次」。

其實相關帖文，早在去年已被上傳facebook，不過最近因叮噹大熱，原帖文再被「翻炒」，該齣叮噹大電影才再被「鞭屍」。