盂蘭圖輯獲《國家地理》獎　港青：等退休再尋攝影夢

同一個比賽，同一個獎項，有人一相成名，有人卻站在燈火闌珊處，似被忽略。「有冇攞獎唔係最重要，反而張相可以令更多人關心社會，啟發啲人諗得更多，我會更開心。」
結果憑著10張紀錄盂蘭勝會的相片，拍攝戲棚內的光怪陸離，成功獲評審青睞，奪得《國家地理》（National Geographic）攝影大賽「佳作」獎，他的名字叫，鍾劍彬（Ben）。

「神功戲」予人感覺「好老餅、好唔現代」，每年在農曆7月盂蘭節，準時在多區上演，可惜「買少見少」。33歲攝影師Ben接受《香港01》訪問表示：「好驚呢啲文化，好快會消失。」為了留住此刻仍有的文化，他選擇「同地區人士多接觸，同社區多啲互動」，為一些問號尋找答案。

「有時我會想，他們日後的生活會如何呢？」

奪獎圖輯以問號作為註解「（神功戲）演員們均很年青，有時我會想，他們日後的生活會如何呢？」因為參與盂蘭節神功戲的演員，也會從內地聘請劇團來港表演，多為潮州人，農曆7月期間，該批演員的日常起居，都在後台的戲棚。

高手在民間　「拉拉吓二胡，轉身走咗去拉大提琴」

「當時跟個前輩入去影相」，Ben捕捉很多光怪陸離的影像，「邊拉二胡，邊食煙，隔籬仲有個大提琴」他指各人貌似粗鄙，卻表現得「好奔放」，不拘小節，只要音色適合，無論中西樂器也可同台演出，感覺何其地道。Ben又發現「拉拉吓二胡嗰個人，轉身走咗去拉大提琴，好似咩都識咁」，真正「高手在民間」。

攝影師眼中精彩的畫面，卻漸被時代的洪流淘汰，Ben慨嘆：「以前細個，度度都有盂蘭勝會，好熱鬧好開心。」雖然盂蘭勝會於5年前獲列入《國家級非物質文化遺產名錄》，然而參與的人越來越少，也漸漸青黃不接。Ben表示拍攝當日，「見到有班中年人，帶住一班20幾歲後生仔，但佢哋做完戲返上去（內地），就會出去打工，久而久之，就會離開呢行」。

「退咗休先可以諗『攝影夢』」

3年前接觸攝影的Ben，從此醉心。被問到有否想過以攝影作為職業，他笑著「秒回」，說：「老婆唔會放過我！」皆因Ben目前在政府從事文職，生活穩定，相比起攝影師的收入不穩，他慨嘆：「唯有退咗休先可以諗（做攝影師）。」他續指，「有比較年長的同事同我講，前半生顧掂咗家庭，養兒育女，退咗休先做自己鍾意做嘅事」。距離退休幾十年「流流長」，如何「止癢」呢？他說：「有時去旅行幫屋企人影吓靚相，生活相，已經好滿足。」