Gary退出《Running Man》　鍾樂偉：韓國節目求變　香港十年如一

韓國SBS電視台昨證實，藝人Gary將退出綜藝節目《Running Man》，大批節目觀眾感不捨。
為何Gary離去會引起巨大迴響？對節目又有何影響？韓流文化專家、中大社會科學院全球研究課程助理講師鍾樂偉為你全面剖析。

韓國綜藝節目《Running Man》播放至今6年，一直深受各地觀眾喜愛，惟昨日韓國SBS電視台證實，元老級成員Gary（原名：姜熙建）將退出節目，大批粉絲紛紛稱不捨「周一情侶」（指Gary與女藝人宋智孝的組合），亦有粉絲稱「尊重Gary的選擇」、「祝福Gary為音樂而退出」。

韓流文化專家、中大社會科學院全球研究課程助理講師鍾樂偉向《香港01》表示，韓國綜藝節目競爭甚大，近年《Running Man》主力發展海外市場，玩法「冇咁突破」亦開始見老化，變相在韓國收視持續下滑，多找明星擔任嘉賓以求「止咳」。Gary離去相信有其個人考慮，「對佢而言《Running Man》已經冇以往咁重要，現階段音樂更加重要」。

中港台粉絲對Gary離去大感不捨，更有人形容猶如失戀。鍾樂偉指Gary已擔任《Running Man》主持人7年，「（粉絲）有感情……佢地（主持人）的而且確係殿堂級搞笑人物」。但他認為Gary離開反映製作人需思考如何提升節目質素，「尤其另外6位（主持人）都有自己專注事業，綜藝節目變成其中一樣參與嘅嘢。佢哋知節目對當地影響力低咗……同一班底再玩落去，好多嘢都會褪色，會覺得悶」。

反觀香港，《獎門人》等綜藝節目亦播放多年，主持人亦常變動，為何從未出現Gary的「洗版」效果？鍾樂偉指《Running Man》製作認真、氣氛緊湊，「呢7個（主持）人真係會玩到好癲……Fans好想見到明星呢一面」；但在香港則不然，「十年前獎門人同十年後一樣，玩辣辣壽司，拎啲嘢掟嚟掟去」，他指現時觀眾會上網觀看海外節目，「發現香港落後好多，落差一大，啲人就唔睇……佢知你抄得好低莊，就拎嚟笑……點會有感情喺背後」。