【大晒咁】普通話大媽稱LEGO買貴咗逼回水　老闆無奈允揀差額貨

網上瘋傳有操普通話中年婦人，日前被指LEGO集中地的油麻地「現時點」商場與一店舖老闆理論，聲稱所購產品較其他店舖貴50元，要求老闆退差額；老闆妥協屈服，最終讓大媽免費挑選與差額同等的產品。事件引起不少LEGO迷反感，留言買貴只因大媽自己唔格價，有人指曾遇類似情況，但企硬不屈服。

下載「香港01」App ，即睇城中熱話：https://hk01.app.link/l7U1Y7t5LO

有網民在社交網站facebook群組「今日一入玩具報價區」發文指，本周一（1日）、國慶假期當日，經過現時點1樓其中一間店舖時，見到一名操普通話的中年婦人走入店內，向老闆聲稱「盒LEGO要退錢，因為喺第二間舖見到平你好多，成50蚊」。

該網民形容大媽與老闆態度尚算和平理性，老闆無奈下「叫佢喺舖揀50蚊嘢補畀佢」，但如超過差額就要補錢，他語帶諷刺形容「覺得喺香港購物真係太幸福了」。

事件引起多名網民批評，有人認為老闆做法不智，「老闆都低能，使鬼做任何（嘢）補返，好似欠咗佢，使鬼理嗰大媽，香港自由市場，你買貴係你唔格價，你買得就接受到先買」，更有人留言指「識講普通話就退到？」、「原來學普通話會有啲好處」，亦有網民擔心「做壞個頭，今次真係畀佢呢間舖害死成個場（同）其他舖」。

亦有賣家稱早前向一名內地女子出售貨品，「一星期後，我第二批賣平咗廿幾蚊，佢走返轉頭叫我退返嗰差價畀佢」，賣家反駁稱「靚姐，今日你喺百佳買罐豆豉鯪魚，第二日人哋買一送一，你係咪會去拎返人地一罐？」但對方反斥他是「奸商」、「以後都唔會幫襯」，賣家嬲爆直接叫內地女「拜拜」。

（fb群組「今日一入玩具報價區」）