【熱評】蜑家人的十號風球 茶居免費飲食招待水上人避風
文：蜑家妹出走記
第一次有歷史文件記錄銅鑼灣被颱風吹襲，應該係1906年嘅 《The Calamitous Typhoon at Hong Kong, 18th September 1906》。報告記述了這無名風暴喺短短兩個鐘頭為香港帶來廣泛破壞（翻譯）：「平日平靜似水磨坊嘅維多利亞港，變成小型船隻嘅陷阱。過海渡輪停航，但海港內嘅水上人家就啦啦臨將船駛入避風塘⋯⋯卜公碼頭、皇后碼頭同天星碼頭嘅涼棚，好似紙牌屋咁逐個被吹塌。
下載「香港01」App ，即睇城中熱話：https://hk01.app.link/l7U1Y7t5LO
沿住西角（西環）至東角（銅鑼灣）海傍，都見到好多舢舨被吹埋岸邊撞向海堤；被撞散咗嘅舢舨殘骸同碎片飛曬上馬路。
銅鑼灣渣甸貨倉完全被摧毀。當時喺銅鑼灣嘅歐籍同華籍人士，見到水上人家嘅舢舨抵受唔住狂風巨浪，都奮不顧身落海救人。剩係糖廠經理同佢地嘅員工，起碼救咗七八百人上岸。有個叫Stanfield嘅少年，就响Bowrington Canal（鵝頸橋/堅拿道）嗰度救起咗十四五個人。」
阿媽：纜繩就係生命線
「以前打風，我地好忙㗎！邊似得而家有人會希望打風放假。」
「打風嗰陣我地一般都唔會離開隻艇，無人睇住隻船仲危險！忙咩？忙睇天色、睇風向、放纜繩兼綁纜繩。銅鑼灣避風塘有好多浮泡，由鋼鍊連住海底石墩。將家艇用繩綁好响浮泡之後，就係考驗嘅開始⋯⋯」
「第一係風暴潮。我地要打醒十二分精神睇住水位。由於水位會突然暴漲，見到水位越來越高，就要即刻根據水漲高度放繩，俾隻艇仔平穩浮响海面。我親眼見過有人放唔切繩，因為海水可以暴漲得好快，睇住佢隻艇變相被扯落海。」
「第二係風向，一定要俾船頭迎風，隻艇先唔會翻側；側咗隻艇咪入水，然後家當跌曬落海，最後沉船囉。所以我地要睇實風向；風向一轉，就要解開原本綁好嘅纜繩，將艇迎住風向，換去綁另一個同艇頭同風向一致嘅浮泡。」
我：（不識時務）有無响打風期間影低當時情況？
「傻的嗎？都話咗好忙，唔夠快手做嘢就俾人鬧死。」
我：咁你最印象深刻係邊場風？
「嗰次⋯⋯唔記得個風叫咩名㖭！總之當時銅鑼灣怡東酒店剛剛開業，呀，嗰年李琳琳同姜大衛响怡東酒店結婚，之後就打風。酒店有個棚架仲未拆下，暴風中個棚架搖搖欲墜，爭啲跌落嚟擊中銅鑼灣啲艇仔！我好肯定呢場颱風個名同李琳琳個女係一樣㗎！」
（感謝Google大神，母親大人講嘅呢場颱風，係1974年嘅強颱風伊蘭）
舅公：連續24小時玩「海盜船」
「溫黛打到嚟嗰陣，我得十二三歲，啱啱做開始boat boy，幫手打理一艘泊响皇家遊艇會、船身超過60呎嘅帆船。」
「打風之前，一定要將船用蝦鬚繩（8字繩）綁好响浮泡。平時大帆船要船頭船尾各綁兩條繩，天氣惡劣就綁雙倍；溫黛吹襲其間，我地要綁三重繩，即船頭船尾共12條繩先勉強拉得住隻帆船。」
「由於帆船太長，唔可以好似舢舨咁因應風向調頭，只可以睇住水位放繩。不過帆船可以擺動嘅幅度較大，所以都捱得住嘅。反而船與船之間要放足夠fender，避免碰撞。」
「嗰時我地响銅鑼灣，可以望到尖沙嘴訊號山，真係見到天文台掛風球㗎！見到有個倒轉T字就知係三號風球。呀，仲有風暴訊號燈，係三盞白色或綠色組合嘅燈。一號風球係三盞白色燈、三號風球係三盞綠色燈，不過之後五號、六號、七號（以前有五六七號㗎！）、八號、九號、十號就唔記得係咩白燈綠燈組合。」
我：（又不識時務）點解唔記得？努力啲諗下啦！
「傻妹！之後橫風橫雨，都望唔到對面海，完全無印象，點會記得？！不過除咗風球同訊號燈，天文台仲有一樣秘技——風炮！當掛九號或十號風球嗰陣，天文台就會點炮，成個維港同維港兩岸都聽到。」
「講返頭先，咁我就留响帆船上面，暴風不停吹，吹過桅桿帆繩之間，咈咈聲勁得人驚。最大風大雨嗰陣我入船艙避難，成排帆船俾暴風吹到向兩邊四五十度搖擺。同我講玩海盜船？你試下咁連續搖24小時再講啦！」
表伯：風波裏的茶居
「我細細個住响婆婆嘅艇。颱風打到嚟嗰陣，我阿姨會帶我上岸避風。其實呢個時候，就算喺海堤入面，海面風浪已經好大。阿姨帶住我地幾個細路，搖艇去岸邊，催促我地爬上木梯上岸。呢條木梯係水上人自己搭建，因為响海邊，梯上經常有青苔同蠔叔，又跣又𠝹手，而家諗起都驚。」
「安全上岸後，阿姨會帶我地去歌頓道一間茶居避風。呢間茶居老闆同伙記好有愛心，會免費招待銅鑼灣蜑家人避風，仲會俾熱茶熱食我地，等風暴過咗先返落艇。」
facebook ：蜑家妹出走記 https://www.facebook.com/strollingtanka/
（文章標題由《香港01》編輯所擬。文章純屬作者意見，不代表《香港01》立場。）