連登絲打唱K捧韓貶港　嘲張國榮張學友「衝唔出香港」惹3000負評

香港歌星及廣東歌在全球發光發熱，不少經典金像風行全球，但近年光芒被K-POP（韓語流行歌）稍為掩蓋，而香港不少新生代亦熱愛K-POP而少聽廣東歌。有女網民早前在連登討論區發帖，指與90後及千禧後同事「唱K」點唱韓文歌，不滿70後同事突然加入，並點唱了張國榮及張學友的歌曲，世代之爭不歡而散。樓主在帖文形容「雙張」是「衝唔出香港嘅歌手」，甚至「以後冇咩必要都係唔好同啲老嘢唱K」。
帖文狂吸3000個負評，有網民笑問是否「潮文？」，直指「人哋衝出國際你都未X出世啦」、「知唔少90（後）00後都鍾意張國榮…眼光咪咁短淺啦，井底蛙」。

下載「香港01」App ，即睇城中熱話：https://hk01.app.link/l7U1Y7t5LO

有自稱「99後」的女網民本周三（8日）在連登討論區發文，指當日「同成班同事唱K…入面全部都係90後同00（後）」，其間有一名70後同事表示想加入，一眾年青人「好唔情願咁話一齊去囉」，但暗地裏「開group」批評對方破壞氣氛打擾興致。

一眾年青人入房後點唱韓文歌，例如女歌手IU、男團BIGBANG，但該位70後同事問「佢哋係邊嗰？同埋做咩唱韓文歌？」隨即點唱《有心人》及《遙遠的他》共2首廣東歌，女樓主在帖文形容這是「聽都未聽過嘅垃圾歌」，上網搜查得悉由「張國榮、張學友呢啲衝唔出香港嘅歌手」原唱，其中一名年青人取笑70後同事「老餅」，對方感到不快，隨後離開，女樓主崇韓抑港，在帖文更寫「以後冇咩必要都係唔好同啲老嘢唱K」。

帖文一出後引起近3000負評及逾110正評，樓主其後留言問負評是否主要來自中年用戶？更與其他網民唇槍舌劍開戰，有人問帖文是否「潮文？」，指張國榮與張學友「衝出國際你都未X出世啦」，亦有張國榮歌迷留言指「知唔少90（後）00後都鍾意張國榮，包括小妹，衝出嚟X？眼光咪咁短淺啦，井底蛙」；亦有人指「講笑咩？張學友大把90後聽過啦，張國榮好多fans」，另有人表示「風水輪流轉，到時你又咪係畀班10後笑」。

但有少數網民認同樓主觀點，指年紀較大的人士嚮往香港輝煌時代，坦言「真係冇咁多時間去識幾十年前嘅人」，樓主形容年紀較大者「唔識向前看」，年輕人要在googlde搜尋後，才知張國榮及張學友是誰。

不過有網民懷疑事件的真確性，留言指「基本尊重都唔識，如果件事係真，樓主應該幾乞人憎」、「擺明假膠」、「樓主如果係假膠就算，真膠就檢討吓」，甚至有人指現時卡拉OK沒有張國榮版本的《有心人》，懷疑女樓主編造故事，亦有人疑「曲線」留言，自稱無綫藝人「張振朗我就識」。

不過，有網民藉帖文慨嘆廣東歌近年的確是弱勢，「咪就係你呢啲人令好嘅廣東歌一直沒落，淨係識聽韓文」。

翻查資料，已故歌星「哥哥」張國榮的專輯《The Greatest Hits of Leslie Cheung》於1989年在韓國空前賣出30萬張，而專輯《寵愛》更在韓國大賣50萬張，至今沒有其他華語唱片可以打破紀錄；2009年韓國首爾舉辦以張國榮命名的「張國榮電影節」，這是韓國首次為懷念特定明星而舉辦電影節，2010年上海世博會，韓國館官方公布在韓國最具人氣的中國影視演員排行榜，張國榮名列第三，當時哥哥已逝世7年，但當地影迷歌迷亦十分懷念他。

而「歌神」張學友亦早已「衝出香港」，1993年專輯《吻別》在全球大賣400萬多張，台灣佔了四分一，至今仍保持台灣最高唱片銷量紀錄；而1995年，張學友的唱片銷量名列全球第二，僅次於美國歌星米高積遜，而其歌迷亦遍布全球，每次舉行世界巡迴演員會，各地門票均大賣。

（連登討論區）