港鐵抄新海誠？宣傳片畫風似到足　網民批劇情唔貼地：無訊號故障

日本動畫導演新海誠前年憑《你的名字。》在全球大賣，有人稱他為「新宮崎駿」，其畫風獨特，亦擅長以真實細膩的背景構圖，成功在港掀起熱潮。其後港鐵「食住個勢」，推出相似畫風的海報，被網民鬧爆無恥，「抄到十足」，詎料港鐵似乎「見過鬼都唔怕黑」，近日再推出極似新海誠畫風的宣傳片，惟眼利的網民當然不受落，瘋狂留言洗板批評短片不夠寫實，「架車竟然無訊號故障」，又笑指「粒隕石未跌落嚟鋼筋已斷」。

港鐵facebook專頁上周二（3日）上載短片，該短片以《她和他的第一句話》為題，講述日日搭港鐵的男女主角，雖然每次都擦身而過，但彼此都有熟悉的感覺，想跟對方開口又欲言又止，片中兩位主角不停在港鐵相遇，中間加插「請先讓車上乘客落車」、「請勿靠近車門」、「請盡量行入車廂」等熟悉的港鐵廣播，惟短片的畫風及劇情，均令人不禁想起新海誠的大熱動畫《你的名字。》。

短片上載短短一周，即引來大批網民留言炮轟，除批評短片涉抄襲外，更指內容不夠寫實，「車廂邊有咁多位，四圍都係人同喼」、「架車竟然無訊號故障」，又形容港鐵故障時的行車速度，「是秒速五厘米」，更有網民笑指「粒隕石未跌落嚟鋼筋已斷」，諷刺港鐵沙中線的鋼筋風波。有網民則建議港鐵可改用「麥兜」宣傳，「話晒本土嘢」。

另外，facebook專頁《我睇咗啲乜嘢》就推出惡搞版，將宣傳片配上《你的名字。》音樂、原裝對白及新字幕，包括「投訴咩喎，又起身返工啦」、「又故障？遲到又有藉口噜」等，惡搞片上載不足一日，已有超過10萬點擊率，不少網民坦言好睇過原版，亦有人笑問 「點解無磒石撞落港鐵總部果幕」？

（港鐵fb專頁、fb專頁《我睇咗啲乜嘢》）