商場要求免費試鐘90分鐘表演　音樂人鬧爆：返工試用期都有糧出

人類總是重複同樣的錯？網絡上不時傳出，有人對藝術家或音樂家提出壓價要求，甚至無酬演出，因而惹來批評，認為這是不尊重藝術。最近有音樂界facebook專頁分享一件真人真事，指有商場要求樂手免費試演一場，如果反應好或會再度合作，專頁不禁怒罵「點解返工試用期都有糧出？音樂表演者就要玩試鐘」。
帖文引起網民熱烈討論，不少音樂人紛紛留言，抱怨被要求「試鐘」的經歷，又指行內總有人會「賤價接job」造成惡性循環。

facebook專頁「樂活道」前日發帖，稱收到觀眾投稿，指某大商場要求表演者免費「試玩」一晚，兩場45分鐘表演，合共90分鐘，其後才決定未來有否合作機會。專頁不禁問「點解返工試用期都有糧出？音樂表演者就要玩『試鐘』，仲要玩足90分鐘！」又稱如果找來多個「義工試玩」，「一季演出費即可袋袋平安」，並在標籤稱「尊重自己、勿做爛市」。

從專頁上載的WhatsApp對話截圖顯示，商場一方詢問表演者可否免費來唱一場，「如果反應好，我哋之後會再搵佢哋合作」，不過換來對方反擊「而家試鐘啊？返工試用期都有糧出」，又指要免費唱一場再作決定，實在難以接受。

「樂活道」接受《香港01》查詢時指，試鐘事件是最近發生，事主最終都不接受商場的要求。專頁又指演出費因人而異，難以一概而定。

不少音樂人見到帖文都有所共鳴，有樂手稱最近亦被邀請到機場免費試唱，只安排15分鐘表演時間，又試過獲邀到寵物嘉年華唱歌，但報酬只得一個寵物店會籍，「唔止冇錢比你表演，係你嚟表演完，仲要賺你錢！」有人則着專頁公開商場名稱，但專頁拒絕稱以免連累投稿人，並補充指「以試玩、比表演、曝光機會嚟呃音樂人做義工嘅情況都相當普遍」。

有網民則批評商場「當音樂人係狗」，認為街頭表演都有人打賞，「何況搬樂器都要僱用運輸，咪傻啦」；又指「有冇女仔可以試下鐘，睇下大家之後仲有冇發展機會」、「商場都應該試下出糧先，唔係我點知你會唔會拖糧呀」；另有人建議「不如叫啲大媽去算啦」。

但亦有行內人士則慨嘆，因即使是試鐘，相信「一樣有大把食飽冇憂米嘅人去做」，特別是一些新晉樂手會收賤價接工作，「所謂當攞經驗冇所謂心態，導致啲老闆久而久之愈比愈賤，甚至乎貼錢去做」，令人悲哀。