《復仇者聯盟3》場次密　僅餘數分鐘清潔　員工斥觀眾自私遺垃圾

觀眾入戲院看電影，睇完大可拍拍「籮柚」走人，但遺下的垃圾，卻令戲院職員叫苦連天。近日Marvel英雄大片《復仇者聯盟3：無限之戰》（Avengers: Infinity War）在港上映，吸引大批影迷爭相入場朝聖，而多間戲院亦密密上畫，每日場次多達十多場。惟觀眾睇得開心，戲院職員卻道出當中辛酸，一名職員日前在網上發文，投訴因該戲的場次太密，觀眾離場時留下大量垃圾，下一場觀眾又趕住入場，令他們沒有足夠時間清潔，壓力爆煲，抱怨「乜掉返自己既垃圾都咁難咩？」。

該戲院職員今日凌晨在連登討論區發文，指近日《復3》上映後，幾乎每場都爆場，當中大部分觀眾都會留到最尾等「彩蛋」，但每次散場後，座位上都遺留大量垃圾，讓他跟同事大為不滿。他解釋平日片尾的時間，「就係我哋散場清垃圾嘅時間」，但《復3》片尾太長、有「彩蛋」、場次太密關係，往往等到觀眾離開時，他們僅得幾分鐘清理現場，「趕頭趕命，掃又掃得唔乾淨，啲客又係咁問入得場未。」他坦言每次見到一堆堆垃圾在座位，「真係好嬲」，抱怨觀眾不會自動自覺掉垃圾，令他們工作量及壓力培增，亦會阻礙下一場觀眾的入場時間，質疑「乜掉返自己既垃圾都咁難咩？」。

自稱是Marvel迷的他，坦言明白觀眾的興奮心情，亦不介意他們留到最尾，但「每日排隊買飛、買嘢食、入場嘅人都係唔會停」，所以希望大家自律小小，「記得等埋片尾先走，但好最自己掉返垃圾」，減輕他們的負擔，「唔使掃得咁辛苦」。記者翻查戲院資料，以五一公眾假期為例，百老匯院線尖沙咀The One共有26場上映（2D及3D），而Cinema City朗豪坊則共有26場上映（2D及3D），幾乎每小時均有場次，相當誇張。

不少網民見狀，均認同觀眾應「自己垃圾自己掉」，怒斥部分港人難服侍，「畀多少少錢當自己大帝」，亦指戲院門口位置已有大垃圾桶，希望每人可以做多一步。不過亦有網民指出戲院安排有問題，「唔應該片尾時間就入嚟收垃圾」，認為片尾屬於電影一部分，「觀眾有權睇埋佢」。