婚宴姊妹、兄弟毒舌互數　　「太肥大汗好臭」「終於擺脫班極品」

話說婚宴散席，姊妹一上的士，便七咀八舌批評一眾兄弟，由兄弟在接新娘遊戲中「唔玩得」，到直接批評「太肥又大汗好臭」，句句毒舌毫不留情。那邊廂，兄弟也批評姊妹「港女」掛住自拍帶漏東西，以至「樣貌同身材都係超流」⋯⋯的士司機「剝花生」聽故仔，決定公諸同好，讓大家評評。

姊妹篇：

「班兄弟真係唔係路㗎，你知唔知⋯⋯」

明明得三個人講，兩個人聽，不過三個人講嘢聲叠聲，你一言我一語咁，依然有七嘴八舌嘅氣勢。

總括嚟講，我聽到約莫有八大罪狀。

負責揸花車嘅新郎表弟成日唔見人。由接新娘到開席，失蹤咗兩次，每次都成個鐘。

「成日唔見人，係咪去咗叫雞呀。」

「係咪以為無叫佢就唔使做嘢呀？側側膊就走咗去。」

「喺度又點，喺度都係唔做嘢㗎啦。」

玩遊戲時唔肯就範，就範完又扮病。

「戴（笠？）下底褲都唔制，完全唔玩得！」

「飲下白醋、食下辣嘢都又痾又嘔，都唔知真定假。」

「我上次做姊妹呀，班兄弟逐個咬住M巾玩遊戲㗎。」

食完早餐先接新娘。

「黐線㗎，食完早餐先嚟，又唔買多份，完全唔識做嘅。」

「我上晝食咗個包咋。」

負責做MC嘅兄弟Marcus唔肯畀新娘媽咪朋友影相先。

「Auntie咁多Friend，梗係要逐張影晒先得啦，男家親戚咁熟咪等下囉。」

「佢哋都無腦嘅，死都要每邊輪流影，完全都唔就女家嘅。」

食煙。

「一得閒就同新郎去煲煙，有無搞錯呀。」

「每兩個鐘就輪住消失，好麻煩。」

幫姊妹拎嘢時黑面。

「佢個細佬真係好無風度囉，叫佢拎嗰少少嘢就黑晒面。」

「幫我哋抽下個袋啫，好似攞佢命咁。」

望都無望啲姊妹。

「你覺得Paul同Marcus係咪Gay㗎呢，望都無望我哋。」

「咪係，可能扮Gay扮Cool引我哋睬佢。」

開門利是太少。

「班兄弟又車又樓，開門利是畀得嗰幾千蚊。」

「都Cover唔到我哋啲人情。」

「最蝕係今次。」

除咗八大罪狀，問罪過程中仲穿插住唔少人身攻擊，除咗上述嘅Paul同Marcus疑似扮Gay引姐妹，仲有Andrew副LV眼鏡好浮誇，Paul太肥又大汗好臭，新郎細佬做伴郎柒下柒下等等。成程車嘈雜到不得了，聽佢哋講嘢嗰種咬牙切齒，會覺得班兄弟真係罪大惡極。我都識時務者為俊傑，連聲附和話班兄弟真係無鬼用又無責任感，偏偏心底裡嘅聲音不停喺度大叫：「呢班係港女嚟㗎，港女呀，你嘅良知去咗邊？」，雖然係咁，對專業司機嚟講係應該做戲做全套，落車仲要叫佢哋小心啲，講完我都覺得有啲良心不安（良心有啲過意唔去）。

司機送了一眾姊妹後，輾轉回到同一酒樓門外，接到另一群散席後的兄弟。

兄弟篇：

「頭先你表哥做咩要出去唔睇註冊嘅？」

「咪班極品囉，明明講好咗佢哋負責花球，臨走都已經三番四次問佢哋有無帶漏嘢，去到註冊處我哋準備好戒指、身分證，先發現無花球。嗰陣班姊妹仲懵盛盛喺海邊自拍緊，睬佢哋都費事啦，表哥咪即刻飛車返金獅攞囉。」新郎細佬講。

 其中一個兄弟就話：「負責揸車都幾麻煩，咁佢今日都Miss咗好多嘢喎，又要睇車無得接新娘，又要攞花球無得睇註冊。」

 Paul搭嘴：「Marcus實話佢寧願睇車都唔想接新娘，係咪呀哈哈哈。」

 Marcus似乎好感觸：「唉，真係唔好提，佢哋杯嘢搞到我連夜晚碗燕窩都食唔落，而家仲頂住頂住，我諗緊如果聽日仲係咁，可能要睇下醫生。」

 「辛苦你喇」、「好兄弟係咁㗎」安慰聲此起彼落。

安慰完後，Marcus忽然充滿驚恐咁問：「死啦，我啲煙食晒㖭，Andrew你有無淨？」

「你成日搶我啲煙，會唔會慚愧㗎？」

話雖如此，Andrew依然伸手遞出香煙一枝，淡淡嘅薄荷味瀰漫喺車廂內。

「唔好意思呀，的士唔食得煙㗎。」喺佢哋點煙前，我先出言制止。

「知道喇師傅，揸住喺手頂住檔咋，一落車就要點煙㗎喇，唔係點搬嘢。」Marcus輕輕鬆鬆咁講，令我可以放下心頭大石。

「乜你哋今日真係好大壓力咩？」我問。

Andrew反問我：「壓力？師傅你做過兄弟未？」

「做過啦，我專做花車司機同司儀嘅。」我答。

「咁你明啦，」Andrew繼續講：「多嘢做唔在講，做得兄弟無計咁多，但係要同班極品合作，都算，仲要畀說話你聽暗示你唔做嘢，都算，做咗嘢又話做得唔好，都算，你知唔知最大壓力來源係咩呀，師傅？」

「開估啦，邊估到啫？」

「最大壓力嘅係班極品唔單止人品一流，樣貌同身材都係超流㗎，睇見都反胃啦。」Andrew似乎盡力抑壓，可惜最後都係忍唔住。

Marcus講：「你份人真係厚道，嗰班八婆點止反胃，仲難頂過我飲嗰杯嘢呀，Sorry呀下細佬，咁講你大嫂啲Friend。」

「驚鬼，我見細佬有幾次仲不滿過我哋啦。」肥Paul插嘴講，睇嚟胖胖嘅身軀並無影響佢嘅觀察力。

「黐線，你哋知唔知佢哋叫我做咩？幫佢哋拎袋喎，都Short Short地嘅，我大佬我都未幫佢拎嘢啦，我條女出街咪又係自己拎嘢，班八婆以為自己係公主，其實公豬都不如。我梗係黑佢哋面啦，唔通仲搭嘴咩？」人哋細佬忽然怨氣大爆發。

落低人落低貨之後，佢哋果然每人手持一枝煙，唔知係壓力太大，煙癮太大，定車資太大呢？好在我無經歷過咁極品嘅姊妹啫，或者我多數做司機，所以唔知兄弟姊妹之間，可能發生過第三次世界大戰。

本文節錄自 《我的你的紅的》

作者：白告 ，80後中文系畢業生，身兼的士司機及網絡作家。

出版社：點子出版

《香港01》 獲出版社授權轉載，大小標題為香港01編輯所擬。