【韓國．紅葉攻略】首爾、江原道五大賞楓勝地 自由行打卡必去
九月至十一月係韓國賞楓最佳時間，而且秋高氣爽，特別適合一家大細、男女朋友、三五知己結伴同遊～無論去首爾市區，抑或釜山濟州江原道，度度都係賞楓熱點，準備攻韓嘅你就要睇下KKday為你整理左嘅韓國賞楓攻略！今個秋天韓國有邊五大地區賞楓聖地一次打包！
一、 韓國賞楓地：首爾市
#情侶放閃——德壽宮石牆路
德壽宮石牆路係出名嘅情侶拍拖勝地，由首爾市廳對面嘅石牆路開始行到貞洞劇場，全長九百米，沿路楓樹同銀杏樹交錯，紅黃交替令秋日氣息更加濃厚，難怪咁受情侶歡迎！
地址：首爾市中區貞洞 5-1
交通：地鐵1號線市廳站 2號出口，2號線市廳站12號出口→徒步約3分鐘
附近景點： 德壽宮、 德壽宮美術館、 首爾市立美術館、 慶熙宮、 貞洞劇場
#文青必到——三清洞路
賞楓當然唔係情侶專利啦～作為一個文青，一定要去充滿文藝氣息嘅三清洞路！由景福宮石牆路行到三清公園，沿路有雅緻嘅小畫廊同特色小店，所以又叫做「畫廊之街」。另外，三清公園係熱門嘅韓劇取景地點，無論你有無另一半都要去影張靚相留念。
地址：首爾市鍾路區三清洞
交通：地鐵 3號線安國站 1號出口出來後，往鍾路文化院方向前進，徒步約6分鐘
附近景點：國立民俗博物館、 景福宮、 三清公園、 青瓦臺前道路、 青瓦臺舍廊房、 北村韓屋村、 北村美術館、 貓頭鷹博物館
#首爾居民後花園——南山
沿住南山步道一路行，可以欣賞滿山楓葉。如果黃昏時分開始行，由南山圖書館開始步行大概十分鐘，可以望到南山N首爾塔，喺展望台嘆杯咖啡，再睇埋首爾夜景就perfect啦～
地址：首爾龍山區厚岩洞
交通：地鐵4號線忠武路站4號出口→前面公車站搭乘首爾02號黃色循環公車(約需20分鐘)至南山圖書館下車
附近景點：N首爾塔、南山戶外植物園、德國駐韓文化院、南大門市場、南山谷韓屋村、韓國之家、獎忠洞豬腳街、明洞
#市區中的樂土——天空公園水杉道
天空公園係世界盃公園其中之一，水杉道長900米，有茂密嘅樹林、金黃嘅芒草，仲有銀杏同楓葉，散步嘅時候十分涼爽。天空公園裡面幾乎冇人工設施同商店，令公園大自然融為一體，但遊客就要事先準備好飲品同零食。
地址：首爾市麻浦區上岩洞
交通：地鐵6號線世界盃體育場站 1號出口出來，往天空公園方向步行約13分鐘
附近景點：世界盃公園、蘭芝漢江公園、首爾世界盃體育場
二、 韓國賞楓地：江原道
#異國情懷——南怡島
講南怡島你未必知喺邊，但係「小法國村」你就一定聽過。喺「小法國村」附近嘅南怡島，因為「冬季戀歌」而深受遊客歡迎，除左浪漫雪景之外，每逢秋天更會變成一整片紅色樹林，無敵靚！另外，道地春川炒雞亦係小編真心推薦！
地址：京畿道加平郡加平邑北漢江邊路1024
交通：首爾地鐵京春線加平站出口後，可選擇搭乘計程車或循環公車到南怡島渡口，在搭乘渡輪就可以抵達南怡島
附近景點：小法國村、晨靜樹木園、春村辣炒雞排
#登山者挑戰——雪嶽山
韓國有好多出名嘅國家公園，同時係登山賞楓嘅好去處。雪嶽山係每年韓國楓葉最早轉紅嘅地方，吸引唔少遊客，而且有好多登山路線可以挑戰，鐘意一邊做運動一邊睇風景嘅不妨一試。
地址：韓國江原道麟蹄郡
交通：搭乘市區公車7或7-1號，至終點站雪嶽山小公園站下車
附近景點：權金城、神興寺、飛仙台
三、慶尚北道（慶州）、慶尚南道（釜山）
#世界文化遺產——慶州佛國寺
佛國寺係1995年列為世界文化遺產之一，寺內有七件韓國國寶，包括多寶塔、釋迦塔、藍雲橋同兩座金銅大佛等等。佛國寺歷史悠久，而且風景優美，唔只受遊客歡迎，亦吸引韓國佛教徒參拜。雖然慶州距離釜山有一個鐘車程，不過風景咁靚，絕對值得啊！
地址：慶尚北道慶州市佛國路385（進峴洞）
交通：可搭乘KTX到新慶州站後，轉乘700號公車抵達佛國寺站
附近景點：天馬塚、國立慶州博物館
#洗滌心靈之旅——釜山梵魚寺
鐘意參觀寺廟但時間唔夠？梵魚寺號稱釜山第一古寺，係秋天去釜山賞楓嘅好選擇！梵魚寺唔算大，而且遊客唔多，適合想靜靜地放鬆身心嘅你～
地址：釜山市金井區梵魚寺路250（青龍洞）
交通：釜山地鐵1號線梵魚寺站5、7號出口後，往兩個出口中間的路口走約五分鐘，到三信交通巴士站搭乘90號循環公車
附近景點：釜山大學商圈、西面站周邊
四、全羅北道
#山巒起伏——內藏山
內藏山係韓國第八座國家公園，名稱意思係「山內所藏無窮無盡」，除咗有延綿不絕嘅山巒，仲有壯觀嘅瀑布！秋天開始，山頭變成火紅色，每年都吸引世界各地嘅遊客！
地址：全羅北道井邑市內藏洞 、全羅南道長城郡北下面白羊路
交通：地鐵3號線高速巴士客運站→到Centralcity客運站，搭乘往井邑方向巴士→抵達井邑巴士客運站，轉乘市內巴士171號，在內藏山站下車
附近景點：水杉林蔭道、珍島神秘海路
五、濟州島
#人間仙境 — 漢拏山國立公園
傳說係好耐好耐以前，有神仙騎住白鹿去到漢拏山，所以又叫做「白鹿潭」。漢拏山係韓國第一高山，平日已經有唔少行山人士挑戰，去到秋天有楓葉睇就更受歡迎～
地址：濟州濟州市海安洞
交通：在濟州市外巴士站，搭乘 1100路公車
附近景點：牛島海洋道立公園、中文海水浴場、山茶花之丘
雖然講到楓葉第一時間會諗到日本，但其實韓國都有唔少選擇咖～如果唔想幅相充斥住路人甲乙丙丁，今年秋天一於去韓國賞楓啦！
【本文獲「KKday」授權轉載。】