【Lonely Planet推薦】十大2018年必去城市 你今年去咗幾多個？
Lonely Planet寂寞星球公佈嘅2018年最值得旅遊嘅十大城市，由全球五大洲多個城市中脫圍而出嘅，除左有港人熟悉嘅坎培拉同高雄外，仲有比利時、意大利等國家嘅城市上榜，快啲睇下各城市嘅上榜原因同當地景點推薦啦！
1.西維爾 Seville（西班牙 Spain）
西維爾係西班牙第四大城市，安達盧西亞自治區嘅首府。貴為西班牙文化、藝術同經濟重鎮，當地重要嘅文化佛朗明哥同鬥牛都在此發起。現時依座17世紀時全世界最繁華嘅城市內仍然可以搵到摩爾風格建築，而美劇權力遊戲都曾經喺西維爾取景，為依座古城注入藝術活力。
景點推薦：西維爾主教教堂 Catedral de Santa María de la Sede de Sevilla、西班牙廣場 Plaza de Espana、西維爾王宮 Alcázares Reales de Sevilla、西維爾鬥牛廣場 Plaza de Toros de la Maestranza
2.底特律 Detroit（美國 USA）
講起底特律，會唔會對依座城市嘅印象停留喺昔日破舊嘅汽車之城呢？經過一段時間嘅沈寂，底特律重新振作，年輕人將空置大樓改造成釀酒廠、單車店同藝術畫廊，新落成嘅公共曲棍球、籃球場同有軌電車更帶動起整座城市嘅人氣，逐一建成嘅特色旅館都帶有種工業風。
景點推薦：底特律藝術博物館 Detroit Institute of Arts、摩城博物館 Motown Museum、卡莫利加公園 Comerica Park
3.坎培拉 Canberra（澳洲 Australia）
坎培拉是澳洲最年輕嘅首都，亦係喺沙漠中建成嘅人工設計城市，佢嘅都市計畫堪稱人類最理想城市，衣食住行安全又方便，自然公園環繞四周，美食餐廳同娛樂設施大量進駐，仲新建成好多博物館、美術館等人文景點，令遊客可以從中了解神秘嘅澳洲原住民文化。今年11月澳洲戰爭紀念館更會舉辦第一次世界大戰停戰協議100週年紀念活動，相信到時會吸引更多歷史迷到場參與。
景點推薦：澳洲戰爭紀念館 The Australian War Memorial、國會大廈 Parliament House、Canberra、伯利・格里芬湖 Lake Burley Griffin
4.漢堡 Hamburg （德國 Germany）
漢堡係德國面向世界嘅海港城市，更係聚集左好多音樂人、聲樂家同音樂劇演員嘅北方音樂之都。剛建成嘅易北愛樂廳非常壯觀，遠睇就好似巨大玻璃皇冠，成為HafenCity港邊嘅地標。而漢堡河岸邊嘅音樂酒吧、夜店更係享受精彩夜生活嘅其中一個熱門地點。
景點推薦：微縮景觀世界 Miniatur Wunderland、漢堡港 Hamburger Hafen、倉庫城 Speicherstadt、阿爾斯特湖畔 Lake Alster
5.高雄 Kaohsiung（台灣 Taiwan）
恭喜港人最愛嘅台灣上榜！高雄駁二特區經常舉辦各種活動，帶動南台灣嘅文化藝術產業。而自從大東藝術中心落成，充滿實驗性嘅建築吸引左唔少遊客，讓高雄搖身一變成為藝術音樂之都，就連台灣天后蔡依林都去到高雄拍攝！高雄氣候溫暖、可以搵到豐富嘅夜市小食，深受外國人歡迎。另外，如果你希望可以親親大自然仲可以選擇到小岡山天空迴廊飽覽港都景色。
景點推薦：大東藝術中心、駁二特區、小岡山天空廊道、六合夜市、愛河
6.安特衛普 Antwerp（比利時 Belgium）
作為歐洲北部其中一個最好嘅城市之一，安特衛普絕對屬於2018旅行首選之一！因著擁有高超嘅珠寶工藝，安特衛普又被稱為鑽石之城，而當地嘅巴洛克建築不但為十七世紀著名畫家魯本斯帶來無限靈感，現時仍被保留嘅建築物更為城市增添特色。當年嘅藝術發展集中地現時吸引左尼自五湖四海嘅年輕藝術家舉行展覽，舊有嘅碼頭亦增建許多有趣嘅酒吧，趁著歐元貶值時快啲出發啦！
景點推薦：水上博物館 Museum aan de Stroom、安特衛普大教堂 Cathedral of Our Lady、魯本斯故居 Rubens Huis、中央車站 Station Antwerpen-Centraal、丟手雕像 Hand Werpen
7.馬泰拉 Matera（意大利 Italy）
相較於羅馬、米蘭同威尼斯等觀光大城，馬泰拉相對地少遊客拜訪，甚至可能連意大利前十大觀光城市冇份，但小編絕對要大力推薦馬泰拉！馬泰拉有唔少攝影師最愛嘅所保留獨特景色，除左已經有9000多年歷史嘅石窟古城同古老修道院依兩個世界遺產，仲有當地人居住石窟洞，連耶穌受難記等電影都在此拍攝！近年好多當地居民喺唔破壞石窟嘅前提下，將住家改造成旅館或餐廳酒吧，小編都好想試下住石窟屋啊～
景點推薦：馬泰拉洞穴居 Sassi di Matera、洞穴壁畫 Cripta del Peccato Originale、馬泰拉主教座堂 Cattedrale di Matera
8.聖胡安 San Juan（波多黎各 Puerto Rico）
香港人可能會因為距離同文化差異關係，對中南美地區相對比較陌生，但你唔可以錯過擁有濃烈風情嘅波多黎各！走到聖胡安，你可以欣賞到舊殖民文化同新式風格嘅完美結合，仲可以喺街上搵到歷史悠久嘅教堂、古堡、西班牙式小巷同博物館、畫廊、賭場、酒吧同餐廳亦相繼落成，現時聖胡安已經搖身一變成為歐美人最愛旅遊嘅城市之一。
景點推薦：舊聖胡安 Old San Juan、聖費利佩海角城堡 Castillo San Felipe del Morro、聖胡安包蒂斯塔大教堂 Catedral de San Juan
9.瓜納華托 Guanajuato （墨西哥 Mexico）
以銀礦起家嘅瓜納華托完美地揉合左南美熱情洋溢嘅文化同當年西班牙殖民時代遺留下嘅色彩。除左世界遺產嘅彩色山城，喺色彩繽紛嘅街道上亦可以搵到華麗嘅教堂同廣場，就連PIXAR動畫《玩轉極樂園（Coco）》亦係根據瓜納華托依個城市設定故事，鐘意依部動畫嘅朋友不妨抽時間到這城市旅遊！
景點推薦：皮畢拉紀念碑 Monumento al Pípila、聯合花園廣場 Union garden、瓜納華托大學 Universidad de Guanajuato、華瑞茲劇院 Teatro Juarez
10.奧斯陸 Oslo（挪威 Norway）
講起北歐大家會諗起瑞典、芬蘭、丹麥等等，其實大家仲可以考慮到高cp值嘅挪威旅行。不單止因為今年係受人愛戴嘅挪威國王皇后結婚50週年，挪威首都奧斯陸仲會舉辦各式各樣嘅慶祝活動。咁啱地標奧斯陸歌劇院亦因迎接10週年而舉辦慶祝會，現場仲可以睇到好多經典歌劇添！
︎景點推薦：維格蘭博物館 Vigeland Museum、奧斯陸歌劇院 Oslo Opera House、維格蘭雕塑公園 Vigelandsparken、弗拉姆極地船博物館 Fram Polar Ship Museum
唔好等喇！快啲帶埋家人朋友去當地體驗獨特嘅文化啦！
【本文獲「KKday」授權轉載。】