【美食博覽2018】實測虛擬商店方便抵買度 $1黑松露醬搶唔搶到？
近年生活上各方面使費都能用電子錢包輕鬆解決，有時候出街根本無需帶現金，即使去美食博覽都一樣！有電子貨幣平台就在「美食博覽」推出Virtual Store，在會場外的電子屏幕對着QR Code掃瞄一下，就能透過電子程式購買場內的限定精選產品。
「Tap & Go Virtual Store」設於會場內的1B展覽廳門前，兩側有特大電子屏幕展示各種貨品。今次「Tap & Go拍住賞」與15間場內攤位合作，可於其Virtual Store購買到60項貨品，其中15項更會有「Happy Hour優惠價」，何謂”Happy Hour”呢？原來是每日三個時段——12:00-13:00、15:00-16:00及17:00-18:00都能享有低至半價的優惠價，而且最着數的是每日都會不定時有$1優惠，貨品將以$1激抵價發售，想執平貨的朋友一定要捕住！
按下圖即睇Virtual Store「購物步驟」及我的戰利品！
而另一個更吸引的就是「$1 Go」限定時快閃搶購，即Virtual Store內之貨品會有不定時的$1快閃優惠，當中包括生蠔10隻、韓國馬糞海膽、清湯鮑魚兩罐，以及原價總值$490的意大利松露禮盒套裝，通通都是$1！記者到場時，果真突然出現了$1優惠，現場立即起哄，大家紛紛湧到電子屏幕前影低QR Code！當時身邊的確有人高呼「我買到呀！」可惜記者就搶不到，很快這項優惠已變成「Out of stock」，相信存貨只得幾件。
即使有點失望，不過依記者實測經驗，現場還是有其他Happy Hour抵買貨品，記者已經幫大家計定邊幾件減得最多，到時無需在場內花時間撳計數機！15件「Happy Hour優惠價」貨品中，最抵買必定是「意大利白松露醬」，由$100減至$50，即是半價！ 而部分6折之選就是Glintwein Alpin Orange red semi-sweet wine紅酒及The Mask Grand Moscato white semi-white wine白酒（同樣由$140減到$84）、鴨胸釀鴨肝（由$310減到$186）、全熟鴨肝醬（由$180減至$108）、鴨肝摩絲配朱朗松白酒130克（由$110減至$66）、藝人陳敏之旗下餅店「祝奇餅Blesscuit Bakery」的「祝．圓滿」月餅券（由$238減到$142.8），不過請留意，Blesscuit Bakery的月餅禮盒不能在會場內攞貨，要親身前往門市換領。
總括今次經驗，記者對“Tap & Go Virtual Store”有以下評價。
| 優點 | 缺點 |
| $1快閃優惠確實吸引，縱然貨量不多，但真的有人成功購買！ | 聞說書展時可以直接在Virtual Store攤位攞書，但美食博覽卻無法直接在Counter取貨，仍要徒步走去各個攤位攞貨，未能達省時之效。 |
| 可以預先在Virtual Store買定心儀貨品，臨離開美食博覽才去攞貨，不必一路揹住沉甸甸的貨品同人逼。 | 經常在App和網頁之間換來換去，若沒有工作人員指導或不熟悉手機操作者，可能有少許混亂。 |
| 新客戶即場在「Tap & Go Virtual Store」啟動電子程式，可獲$30儲值額，變相送$30給新客戶購買Virtual Store內的產品。 | 部份攤位在「尊貴美食區」，要從1樓Virtual Store走到3樓攤位，並且要額外購買門券。 |
| 有環保袋送，對師奶來說應該是一大賣點，因為現場聽到有師奶查詢如何獲得環保袋。 | 有少量貨品折扣高，但就要去到會場外的門市取貨。 |
| 可以用Tap & Go買電子入場券，省去排隊購票的時間。 |