荃灣寵物用品店變領養所　老闆娘拒賣寵物：做生意要取之有道

香港愛狗愛貓人士可幸隨處可見，但打正旗號宣揚「領養不棄養」訊息的寵物專門店你有聽過？
荃灣一間經營了18年的寵物用品店，店東多年來因見盡無良寵物店的賣寵手法－當隻貓狗是「生仔機器」，又見本港近年流浪貓狗數目激增，因此兩年前開始接收流浪貓狗，為浪浪尋找合適主人，至今經他們店舖領養的流浪貓狗逾55隻。店東接受《香港01》訪問時表示，希望略盡綿力幫助這群無依靠的毛孩。

店主冀宣揚「領養不棄養」意識

位於荃灣享和街的「寵物屋專門店Pet & House Pet Shop」於區內經營達18年，店主Ling接受《香港01》訪問時表示店舖近兩年開始接收流浪貓狗，「宜家一般嘅流浪貓貓狗狗都係義工朋友送嚟，而我哋接收咗佢哋之後會喺網上面出Post，為佢哋搵一個合適嘅主人。」

以「領養不棄養」為宗旨的寵物用品店可說是買少見少，問及Ling為何萌生此念頭，她表示希望為流浪貓狗出一分力，「可能我同先生都好鍾意貓狗嘅關係，好多時候當我哋喺街上面見到無依無靠、無家可歸嘅流浪貓狗，心入面都總會戚戚然，佢哋唔係好似人咁，身受苦況可以一五一十同返人講，所以我哋決定做多少少，幫得幾多得幾多。」

上月「山竹」襲港，流浪貓狗生活安危受威脅，這段期間Ling的店舖從不同渠道接收了逾22隻貓狗：「當時打晒風，天氣真係好惡劣，好彩有義工喺打風期間都好關注流浪貓狗嘅問題，將部分送嚟我到，免得佢哋喺風暴入面受傷。」Ling憶述道。

說起接收流浪貓狗，Ling表示如非必要都不想再接收狗狗，「近年經我舖頭出嘅領養貓狗超過55隻，我想講狗真係一種好有靈性嘅動物，相處耐咗佢（狗狗）會同你有感情，佢亦都會知邊個係真心對自己好，每一次當我目送自己嘅仔女（流浪狗）俾善心人領養，我同老公，同埋細Wing（寵物店員工）都會喊到『飛哩啡呢』，無辦法，我就係一個咁重感情嘅人，我真係當佢哋每一個仔女咁錫。」Ling再度感概說道。

經營寵物行業18年　見盡行內無良事

經營寵物行業達18年，Ling與丈夫可說是見盡行內黑暗事，亦是其中一個原因自己寵物店是永遠不會售賣貓狗隻，而宣揚「領養不棄養」的宗旨，「我一出身就做呢行（寵物行業），以前仲喺出面做人哋員工嗰時，見盡舖頭為咗賺錢，真係會當隻貓狗乸係『生仔機器』，然後明知個B（初生貓狗）有病有缺憾都要賣畀人，就係因為有呢啲經歷，我哋舖頭先唔會賣貓狗，做生意賺錢無可厚非，但要取之有道。」Ling言之鑿鑿說道。

店舖收入比同行低　感恩顧客支持

現時Ling經營的寵物店主要為顧客提供寵物美容服務，她表示店舖收入肯定沒其他有售賣貓狗的寵物店高，但他們並沒有因此放棄，「值得感恩嘅係好多義工都好幫我哋，有個義工係醫護嚟嘅，成日都會幫我哋啲貓狗睇下病，有啲客知道我哋『領養不棄養』嘅宗旨，買嘢明明件貨幾十蚊，賣單就咁擺底500蚊就一支箭走咗去，我哋係感恩有街訪朋友嘅支持。」

Ling希望藉此向《香港01》讀者表示，如果有意領養貓狗，可以隨時聯絡他們的店舖，與一般領養機構無異，Ling會為領養者家訪，了解主人是否適合領養貓狗，給予牠們一個「真正的家」。

FACEBOOK：寵物屋專門店Pet & House Pet Shop
地址：荃灣享和街66A號（電話：2417 0982）