檸檬雞髀 - 優柔遊 ：源於一種hea的概念

檸檬雞髀的創作不只是清新與青春，在躍動的節奏中你可以聽見細節，前主音「阿髀」離隊到Yannis加入，新作更顯製作上的進步，編曲比最大隻的成員bass手阿凌更結實更豐厚。

〈優柔遊〉嘅創作概念？

檸檬雞髀：〈優柔遊〉係源於一種hea嘅概念，優柔取自優柔寡斷，呢個詞語係比較負面嘅形容，通常優柔指一個人好逸惡勞，懶懶閒嘅性格，而寡斷就指無主見，做事猶豫。反觀香港呢一個急促嘅都市生活節奏，返工同吃喝玩樂都離唔開煩囂鬧市。有時大家都嚮往優柔寡斷嘅一日洗滌心靈，而呢首歌正正想帶出呢種無任何計劃、唔需要做決定、隨心所欲嘅度日態度。

這次混音上相比前作〈回首〉有很多嘅進步，而且編曲上多了很多合成器嘅部份，結他亦更突出，為何有這些想法？

鍵琴手Frankie：因為〈優柔遊〉講個人將自己放空去逃避呢個城市既煩囂。喺Verse嘅旋律同編排較迷幻，想表達啱啱起身個一刻嘅模糊同放空嘅感覺， 有點不切實際的。去到Pre chorus同chorus正有一個反差回到現實，從係勞累嘅生活中既宣洩同掙扎，不時加啲合成器(synthesizer) 令幻想和現實的空間連接得更順暢。

結他手雞：〈優柔遊〉結他部分上面，因為希望能讓聽眾有一句一聽就認得出嘅句子，所以選擇寫咗一句重複性較強嘅結他旋律，並想喺歌曲前段營造出較為懶洋洋嘅感覺，喺音色方面加入wahwah同較立體嘅delay，加強空間感。

檸檬雞髀：Mixing(混音)方面，我哋今次多咗好多層track(軌道)，所以令到聲音上面會豐富咗。

可以介紹一吓新主音？

我哋新Vocal(主音)叫 Yannis，喺2016年蒲窩青少年樂隊大賽初次認識到檸檬雞髀，亦因為當日既演出留下印象。機緣下見到招募新主音，當時Yannis自己樂隊因為生活各散東西，亦想嘗試加入做原創音樂嘅樂隊，所以就放膽一試，日後希望享受每次演出並用歌聲感染聽眾。

之前聽過你們一首關於太空嘅〈??〉作品，現在有名字嗎？

首歌最後命名為〈反重力旅行〉。其實構思源自現有太空旅行，而反重力就代表緊擺脫現實生活中既枷鎖或壓力，就好似離開左地球去到一個無顧慮嘅空間。

想hea就去睇show：