【寵物紋身】捨不得兔兔離世　怕痛主人用紋身紀念一輩子

愛護動物無分國界，《香港01》寵物頻道及其facebook專頁歡迎你投稿。來自香港兔主Olle，早前養了一隻兔子「皮皮」，可惜近月皮皮身體情況轉差，持續治療亦無法改善情況，最終離開了Olle。為紀念皮皮，她更在手臂上刻上皮皮的紋身，讓皮皮分秒陪伴在身邊。

皮皮，是我2013年喺兔協領養，原本我上網睇係打算領養另一隻兔兔。去兔協做清籠義工學習養兔仔時，當我一去到，見到皮皮，我就知道係佢。佢望住我，好似叫我做佢主人咁樣，眼神好渴望我帶佢走，所以我就決定咗。
  
我同皮皮有好多開心同唔開心嘅經歷，面對過良性同惡性嘅腫瘤，做手術食藥，一關一關咁闖過。每次手術完，都會令我更加珍惜呢隻小兔兔，我知道佢承受咗好大嘅痛苦，亦好怕會失去佢。

▼▼▼主人Olle與皮皮經歷無數喜與樂！點撃圖片看故事▼▼▼

為兔兔學焗草餅

直到2018年10月，發現佢行路異常，會縮起左手行，我好擔心，因為之前個惡性瘤就喺左手膊頭位置。帶咗佢睇醫生之後，發現係腰椎有椎間盤突出，醫生話食藥打骨針，應該幾個星期會好返，我鬆咗一口氣。但係第二個星期複診嘅時候就已經發現椎間盤壓住神經線，皮皮已經冇能力自己去小便，需要每日人手排尿，而且腳仔亦都未必可以行得返，建議去搵醫生幫佢針灸做laser舒緩病情。即時轉介咗去另一個醫生，開始咗針灸laser嘅療程，並且每日食藥。由嗰日起我同先生就開始每日幫佢人手排尿，早晚亦要食十幾隻藥，一星期複診2-3次針灸，做laser，打皮下水。

由於皮皮唔係好願意食藥，我去學焗草餅俾佢食，亦自己喺屋企種小麥草，每次食完藥就有得食。皮皮就好乖好聽話，每日期待着食藥嘅環節，知我去準備藥，佢就好期待咁望住我，餵完就四圍望，等食草餅，皮皮真係好叻好努力。

只可惜，針灸咗一段時間再照X光時，發現頸椎嘅椎間盤都有突出嘅情況，我心情好低落，但係皮皮唔放棄，我都絕對唔會放棄。嗰日開始，就開始針灸埋頸部嘅部份。我好珍惜我們一齊嘅時間，會帶佢去草地，帶佢出街，平日推bb車咁樣出去。因為要返工，裝咗個閉路電視二十四小時望住佢，亦都會播卡通片俾佢睇。仲記得有人送貨上嚟，仲講咗句「哇，你隻兔仔睇緊幼稚園教材喎！」哈哈。我買咗張床仔放喺床頭，每晚同佢傾完計就一齊瞓覺。

感謝兔兔在生命中出現過

皮皮體重一路下降，醫生幫佢抽血亦發現唔到原因，只有一直加藥。我請假陪住佢，抱住佢睇電視。以前佢可以自己喺呢個屋企無拘束咁四圍走，而家由我做佢隻腳仔，抱住佢走遍屋企每一個角落 。我會同佢傾計，唱歌，講佢知我有幾錫佢，亦好多謝佢喺我生命中出現，為我帶嚟無盡嘅歡樂。

皮皮喺27/03/2019晚上7:10 離開咗啦，其實真係接受唔到，咁耐以來每日都喺身邊，每日見住佢同佢玩，出咗街又會掛住佢，知道佢每日喺屋企期待我返嚟陪佢，所有所有已經成為咗個習慣，係生活嘅一個重要部分。

皮皮，你好叻豬仔呀，主人返咗工，你都頂住等到我返咗嚟攬住你先走🐰😘你而家扎扎跳喺彩虹橋一定好開心啦，有冇遇到好多兔仔朋友？ 🌈 終於都唔洗再每日食藥打針睇醫生啦，仲可以好似以前咁行得跑得跳得！皮皮，無論你喺唔喺我身邊，我永遠都會咁愛錫你！你會係我唯一一隻，最乖最可愛最叻仔嘅小兔🐰

皮皮離開之後，我每日都會幫佢執籠執床仔加食物，每日都對住床仔同佢傾計，播Peppa Pig俾佢睇直至喪禮完成為止，有師傅話過唔好令佢太留戀呢個地方，佢會唔願意去投胎，所以幾唔捨得，為佢好都要放佢走。我問過好多唔同嘅人，如何幫皮皮超渡，帶佢去極樂世界。亦有去黃大仙拜神，保佑皮皮唔會受到痛苦，可以去投胎，過佢開心幸福嘅下一世。我知道皮皮呢世咁乖，為主人帶嚟咁多歡樂，積咗咁多功徳，下世一定會做到最幸福快樂嘅小朋友。

喺皮皮嘅七七，我將佢部分嘅骨灰、毛毛、指甲，用uv滴膠整成咗一隻小兔兔，埋咗喺日本嘅兔仔島。佢淨返嘅零食，帶咗過去兔兔島俾兔仔，每餵一隻兔仔都會叮囑佢哋好好照顧皮皮。皮皮剩返嘅其他物品，除咗幾樣好有紀念價值之外，都捐咗俾兔協，希望幫助其他每一隻兔仔，亦希望為佢積功徳。另外，有部分嘅骨灰做成咗頸鏈，等我可以每日帶住佢喺身邊。我亦成立咗網店，為其他主人用寵物毛毛等做成飾物帶喺身邊，彷彿小寵物一直陪伴主人。

我係一個好怕痛的人，從來都沒有諗過要去紋身。有人可能覺得紋身只係一個點綴，但對我來說，是一個紀念。寵物只係你嘅部分，但你就係佢嘅一輩子。皮皮，用佢一生嘅精力，希望為我帶來無盡嘅歡樂。紋身期間好驚險，我覺得好痛，好驚，對紋身針發出嘅聲音好恐懼，暈低過又醒過。係皮皮賜我勇氣，我成功咗喇！其他人話紋手唔痛，我覺得好痛，但係無論點痛，都冇皮皮離開我咁痛.....我永遠都會記住我最愛嘅小皮兔！
  
好開心好開心，以後一照鏡就可以見到我嘅小兔兔啦！只要見到皮皮，所有唔開心嘅事、煩惱嘅事亦可以拋諸腦後，好似皮皮在生時，我每次喊，佢都會圍住跳，用手仔搭住我。