《Think Big天地》個個都做唔長？　前主持黃愷怡話你知原因

象徵住一個時代嘅譚玉瑛四年前離開《放學ICU》後冇耐，無綫就決心改革兒童節目，到2015年初更大換血，以余德丞、林希靈、黃愷怡同黃碧蓮（之後李雯希同阮浩棕亦相繼加入）等新人擔任最新一代兒童節目《Think Big天地》主持。不過，眨下眼做咗三年幾嘅「Linna姐姐」黃碧蓮最近便正式畢業，令一班小朋友非常唔捨得，但其實佢嘅好拍檔余德丞、林希靈同黃愷怡亦喺大半年前一齊跳出兒童節目另覓發展。

點解班主持做夠兩三年就走，唔似得譚玉瑛、蓋世寶咁做咁耐時間？因為無綫其實是想將《Think Big天地》打造成無綫嘅「少林寺」，等一班新血可以參與幕前工作外，亦嘗試度橋寫稿、錄VO等幕後工作，有咗一定經驗後再轉到其他工作崗位，最後成為瓣瓣掂嘅全能藝人。其中一位「元祖」黃愷怡（Jasmin）受訪時謂：「公司原意都唔想你留太耐，做兩三年就畢業試其他節目。」

Jasmin表示起初沒有想過自己會加入《Think Big天地》這個大家庭：「大學畢業就入咗無綫，咩都想試。雖然兒童節目係公司安排，但好開心可以喺度發揮，因為好多嘢都有份參與，做嘅嘢都涉及主持同Drama。（走時好唔捨得？）即使兩年時間話長唔長話短唔短，但其實呢段時間真係每星期返足六日工，同一班主持、Crew同Writer都朝夕相對、好有感情。（仲有冇小朋友認得你？）平時出街都仲有小朋友認得，但係冇做《Think Big》之前咁多，都會搵我影下相嘅。」

跳出兒童節目後，Jasmin便加入娛樂新聞台，最近更參與節目《深夜美食團》的拍攝：「同以前真係好唔同，唔似兒童節目咁正路，要求嘅嘢都唔同。（跳出嚟時有冇擔心過？）又唔算擔心，因為畀人定位都唔係好事，但真係有諗清楚之後條路點行，了解返自己係一個點嘅人。（余德丞比你行得更前，有冇羨慕、妒忌？）唔可以咁比較，離開《Think Big》只係一個起點。我好戥佢開心，自從《誇世代》後多咗人識，佢係我哋榜樣，等我哋知道只要努力就可以上到去。」

其實除咗加入《深夜美食團》外，佢都成日做大小活動嘅司儀：