【早霸王】黃翊自爆做小販搵食辛酸史：都唔記得你，我寧願唔唱　

資深歌手黃翊最近因為上大台的《流行經典50年》，事隔廿載再度走紅，早前他與星夢老闆何哲圖走很近，有傳下年將會搞個「流行金曲50年演唱會」，黃翊亦會有份。今日他上電台爆料，落實將會在下年年中開個人演唱會，唱足三十首，他說：「初時以為唔使練歌，不過要唱二、三十首歌，加上又跑又跳，雖然我瘦，都要操大隻少少會精神啲！」

黃翊從來沒想過二十年後還會有人期待他復出，他說：「前幾個月開始有個唱歌節目，咁我走返出嚟，原來仲有人鍾意聽我唱歌，有人叫我阿翊出返嚟唱歌啦！咁我個個仔都大，可以抽時間出嚟做音樂。」他回想廿多年前，因為自己任性，不聽公司勸告明目張膽拍拖，結果慘被雪藏提前結束合約，「公司叫我低調啲，但我又冇理，嗰陣有人報料，咩顏色翊同女朋友喺沙灘漫步，唱片公司話你再係咁就雪你，當時本身要錄唱片，但發現冇嘅唔駛錄，張Contract早咗一年結束。」

他自言對自己自視過高，被解約後間中有到大陸登台，又去過馬來西亞拍電視劇，但因為很少在煤體上出現，被觀眾慢慢淡忘，他毅然決定離開樂壇另覓出路，他說：「大家都唔記得你，我寧願唔唱，我唔知自己路向，淨係知要生活要搵錢，要搵出路。」歌手之後第一份工作，是在跳蚤市場賣T恤，這種拋頭露面讓他非常不好受，旁人對他絲絲細語，「難聽嘅說話聽好多，個人唔係咁舒服，會聽到佢哋話唱歌唔紅要撈呢啲，但硬住頭皮都要做。」他感激老婆一直在身邊陪伴，一路走來，一做就賣了七年T恤，跳蚤市場沒空調，天天日曬雨淋，他回憶道：「我開個檔要成個鐘，真係好熱，熱成個人濕晒，冇一度地方係乾嘅！」

後來他姐姐眼見他這麼辛苦，提議他一起做開餐廳做飲食業，起初沒做宣傳，生意很差，全靠一個飲食節目打救，他說：「開咗一年到，有個飲食節目採訪，講以前有個歌手身份既黃翊，轉咗做飲食，個節目六月出街，之後七月暑假，生意係直線上升，我哋招牌係糯米蒸膏蟹，最高鋒一日300籠！」，事業有起息之後，他之後的路亦慢慢走得很順，當然餐廳裡有客人會因為他歌手的身份留難他，但經過在之前跳蚤市場工作的經驗之後，他亦慢慢接受自己的新身份，到今時今日，會有客人專程因為他而到餐廳吃飯，這就是他最大的滿足。