【另類綠色生活】大麻朱古力榛子醬　一次過滿足你N個慾望

意大利食品廠Ferrero的金漆名牌Kinder的朱古力、出奇蛋同繽紛樂，相信各位讀者由細食到大，毋需多作介紹。繽紛樂裏朱古力榛子醬的正式商標為Nutella，香甜味美，是牛油、煉奶、果占、花生醬和澳洲Vegemite酵母醬以外，最受世人歡迎之麵包醬。但有沒有想過Nutella還可以來個究極級進化嗎？

我答你：就係有；還可以好似像出奇蛋廣告般：「一次過滿足你N個慾望」，100%兒童不宜。這款全新加強版Nutella名叫Chrontella，原產地加拿大，製造商為Cannavis，每樽有300mg的大麻提取物「四氫大麻酚 」（THC，全寫為Tetrahydrocannabinol），售價約23美元，如果用嚟食早餐搽多士就真係「未開工，先high爆」。勞碌一生香港打工仔想像下，只需一片Chrontella加持之麵包就能方便快捷地享受「隊草」快感，剎那間忘卻無限OT、做freelance收唔到數、問財仔借錢找卡數、六合彩乜獎都冇……別以為這樣吃一口可令一切塵世痛苦皆消失，正如香港禁毒廣告說：「企硬！Take野衰硬！」

創造力量同幻想會嚇你一跳的Chrontella，只准在加拿大境內的特許煙草店發售，自由如美國都禁入口。人生不如意事十常八九，大麻在香港仍為非法藥物，在此警告各位讀者切勿切勿切勿以身試法（好重要所以講3次），香港廢青更不要羨慕，繼續腳踏實地的過「正常生活」。