【溫多娜手記】 施永青大女擔大旗　繼續「無為而治」管理利嘉閣

中原集團創辦人施永青囡囡施慧勤，今年初接過利嘉閣主席一職。今日（30日）利嘉閣舉行周年餐舞會，呢位新任主席當然要出來講幾句，穩定軍心。

她致詞嗰陣講笑話，叫大家唔好覺得奇怪，點解佢無啦啦會做咗主席。佢話自己過去6、7年都有喺利嘉閣工作，近2年出任董事，雖然少見前線同事與傳媒，但將來會出來多一啲。

「新人事不會有新作風」

佢又話，爸爸施永青已經70歲，所以要交捧俾自己同埋細佬施俊嶸。不過佢就派「定心丸」，強調「新人事不會有新作風」，唔會有大改革，加上自己亦有基金會等其他工作喺身，所以唔會插手太多利嘉閣事務，會繼續爸爸「無為而治」嘅理念，放手俾總裁廖偉強營運。

唔講唔知，原來舊年推出嘅「真盤源」活動，是呢位太子女嘅諗法，佢話推出後市場反應正面，幫到生意，而且自己好有抱負，未來會推多啲「出位嘢」，同時優化成本，做到市好市差都賺到錢。