【01球評．歐聯互動】美斯不是神　巴塞之死　弊在太懶

大衛雷斯唔識聽Eason，巴塞隆拿陣中除了聽Shakira外，亦很難聽得懂謝安琪。MSN去季由阿蘇由利物浦加盟而連線，至去季下半年融合共取122球。今季開局三人都著了火，至三月時便貢獻100球。無奈高峰過總會有下坡， 美斯近仗去南美洲踢國際賽後失靈，職業生涯首次連續5場無入球或助攻。馬體會防守當然出色，正如上月的球評所言，馬體會是8強中最有機會淘汰巴塞的球隊，但無人會相信美斯可以被全場盯死。只有缺態的美斯才不會殺入危險地帶。

【01球評．歐聯互動】要阻巴塞創歷史衛冕　只得一個方法（3月17日刊出）

美斯缺態　不敢殺入對手禁區影響大

全場美斯只有兩腳禁區外埋門。欠了這名阿根廷球星的牽引， 問題就出現了。當美斯在去年11月受傷時，尼馬曾擔起組織重責，成績仍然見得人，想不到幾個月後尼馬換上金魚記憶忘記了這份兼職。唔怕貨比貨，今仗馬德里體育會技術性KO巴塞，中圈位置起緊逼，得球後極速送到基沙文腳下，還有沙奧尼古斯的腳面傳中，賽後連安歷基亦只好承認對手踢得更好值得晉級。

手執一手好牌，巴塞主帥安歷基賽後認衰仔又如何，一樣走唔甩球迷的聲討。還記得去季在西班牙國家打吡，靠死球戰術由後衛馬菲奧頂入關鍵球，但今季就無呢支歌仔唱。原因，或許是人類的惰性。今季一度順到全世界都以為衛冕歐聯加西甲，MSN的威力隱藏了隊中問題，問題愈積愈久終於爆發。巴塞失球少，很大程度與控球率及攻力太強，但中堅碧基近兩季極多大意甩漏，令人更懷念老大哥佩奧爾。今仗失第1球時，照理這名西班牙國腳要看管基沙文，但碧基卻望波唔望人，犯下小學雞級錯誤。

輸波大家都想搵死因，有說比其他西甲隊多踢12場而疲倦不已。輸波近因，老實說因為沒有經費坐飛機去西班牙潛入巴塞基地，無能力解答。遠因或許答得到。由於違規買人被罰，巴塞季初簽入的兩名新兵阿達杜倫及阿歷斯維度至今年一月才註冊上陣，但二人齋練半季後仍未適應，大賽就算有份後備上陣仍欠表現，令拿傑迪錫及丹尼爾近態回落時，只有沙治羅拔圖可以頂上，對戰線甚廣的巴塞而言，陣容深度不足的問題，不應在這支豪門身上出現。