王浩信《踩過界》又要剝衫 肌男都除到灰晒：劇本咁寫只係跟住做
撰文：溫菁莉
出版：更新：
人稱「Signal王」嘅王浩信（Vincent）近年參演的劇集都大獲好評，例如《EU超時任務》，《致命復活》等等。而早前《不懂撒嬌的女人》嘅Saving更是新一代的「暖男」代表，人氣直線上升。而唔知大家發唔發覺，王浩信至少有5套劇都有除衫鏡頭，被封為「TVB除衫王」。他接受《香港01》訪問時表示只是劇本要求，「除衫其實係一件好辛苦嘅事，完全唔Enjoy！」
+7
一眾絲打一見到王浩信除衫都暈哂浪兼尖叫聲四起，他指每逢見到劇本有半裸鏡頭時，拍攝前都要花一番功夫去keep fit，「首先我地要係飲食上面keep得好自律先有咁嘅效果，我亦都唔會咁得閒去同監製講要求我自己除衫。」咁睇嚟Vincent好似唔多Enjoy咁喎，「我係完全唔enjoy，劇本咁寫，身為演員只係跟住做。」至於記唔記得自己拍過幾多套劇集係要騷肌肉呢？Vincent就話，「我無刻意去記住，希望觀眾可以focus返劇集，而唔係留意我有無除衫。」
將於後日播出嘅TVB劇集《踩過界》中，王浩信就飾演一名用「四感搵真相」嘅失明律師文申俠。他為了演好角色，更到盲人中心學習視障人士的生活技巧。而今次佢亦走唔甩，在劇中一共要騷5次肌肉，係入行拍劇以來最多嘅一次，仲話拍攝劇集4個月期間都要食得好清淡。早前Vincent拍攝《不懂撒嬌的女人》期間，有幕出浴戲同半祼跑街，他當時就透露要食足3個月每日3餐烚菜、烚蛋、烚肉、再加少量紅米。所以話世界上邊有免費嘅午餐，抵你一劇接一劇嘅！