【任噏影評．原諒他77次】愛情電影男人無好人 帶女友睇絕對中伏
《原諒他77次》一睇個他字係用男仔他，就知又係一套講個男仔點得罪女仔，之後個女嘅點樣忍氣吞聲咁原諒佢嘅戲。呢啲戲作為一個男生其實係唔應該去睇，因為套戲好可能就係講緊你做過嘅嘢，更加唔應該帶埋你女朋友去睇，因為佢只會好似戲入面嘅阿Sa咁，將一件本來唔應該連埋嘅事一次過講晒出嚟，到最後唔只周柏豪俾人話，連你自己都會身受其害。
當然，如果你係作為一個自信嘅男人，覺得自己好完美，係一個滿分嘅男朋友，以為自己可以帶埋女友入場睇，恥笑周柏豪嘅時候，其實你已經錯得好交關。因為你女朋友只會同你講：「你而家無做過唔代表之後唔會做囉，你睇吓周柏豪同埋黃秋生都係偷偷地背住自己嗰個flirt其他女仔㗎，你要呃住我我點會知啫！」結果你又係被人莫須有地宣布罪名成立，因為喺你女朋友眼中天下男人係一樣黑，你而家無，但係你將來會有。現今大部份嘅愛情電影，男人好似已經成為反派，永遠都要做衰人。葉念琛系列講到好似每個男人都會偷食，志明春嬌系列張志明永遠都係長唔大嘅細路，今次呢套其實都係差唔多，柏豪不停俾阿Sa話佢唔成熟。當佢聽到柏豪唔做律師走去教拳，嗰個反應大到以為唔做律師係會死，雖然佢有兜返話係要尊重柏豪老豆嘅意願，不過明眼人都睇得出佢係覺得教拳係無前途，認為放棄律師呢份高薪厚職係十分不智嘅行為。當然戲中講到嘅唔成熟行為唔只呢樣喇，例如去旅行要plan，點解去旅行一定要plan？你唔俾人鍾意自由自在想去邊就去邊？點解唔plan一定係唔成熟嘅行為呢？
喺套戲入面，惠英紅大概有一句咁樣嘅說話：「女人係咁㗎喇，就係要忍。」聽到之後真係覺得好委屈，咩叫女人就係要忍？點解要講得呢個世界得男人先會犯錯？唔通男人就唔使忍嘅？而家嘅戲將男人標籤為反派，女人就變成充滿大愛而又悲情嘅主角，雖然話而家興女權主義啫，都唔使去到咁盡下嘛？我唔敢講周柏豪做嘅嘢唔係錯，不過喺戲入面佢做嘅每一件事都唔會係啱，郁啲就俾阿Sa寫落小氣簿（即係嗰本原諒他77次）。可能佢的確係會犯錯、唔細心，不過又俾阿Sa連人帶波射入網，將以前錯嘅事又拎返出嚟講。睇到呢度，我醒起子華神曾經講過：「從來其實係有個實質嘅次數，當你衰到第三次，你就從來都係咁衰。」本來我都係當笑話聽吓就算，不過睇完呢套戲真係有好深刻嘅體會，即使柏豪曾經做過咩好事，只要有一樣喺阿Sa眼中嘅衰嘢出現，佢就會俾阿Sa話從來都係咁衰：
買梳化尺寸錯咗，衰！
唔記得阿Sa食提子但唔食提子乾，衰！
送禮物送雲端呢啲喺阿Sa眼中無用嘅禮物，衰！
去旅行唔識路，衰！
朋友遲到無問題，柏豪落雨塞車遲到，衰！
好彩套戲無講足77次係衰咩，如果唔係我真係會覺得男士們係會當場自殺，因為原來男人呢種生物係衰到咁嘅地步，不如都係快啲投胎做女人。當然，現實中唔會所有男人都似柏豪，亦都唔會所有女人都好似阿Sa咁，只係電影嘅世界就係咁，我建議男士們無咩事都唔好去睇愛情片喇。