陳家樂相隔10年重返無綫：我當自己係新人由頭學過

陳家樂今午與黎耀祥、林夏薇等人到電視城出席新劇《逆緣》造型活動，相隔10年由電影跳返入公仔箱嘅陳家樂，今次重返TVB都笑言，「我當自己係新人，好多嘢由頭學過。」

陳家樂透露自己為了接《逆緣》而推咗兩部電影，原來背後原因「巧感動」係為咗嫲嫲，「因為之前專注拍電影，老人家又好少入戲院睇，成日都問我去咗邊，點解唔見我，所以今次拍呢套劇就可以俾佢日日見到我。」推兩部戲咪損失好大？陳家樂就話，「唔可以話係損失嘅，只係時間上撞咗。」他其後指今次要勞煩同劇演員帶佢行電視城，「始終呢套係我首部長劇，拍攝過程有好多都唔係好識，可以話對呢個地方好陌生，好多謝佢哋肯照顧我。」

經常在電影飾演其他演員「阿仔」嘅陳家樂，今次在劇中就飾演黎耀祥同姜大衛嘅爸爸，佢都話好搞笑，仲話有睇兩位嘅劇集。提到近年TVB劇集都被批「膠劇」，問到會否驚呢套劇同樣有如此下場？陳家樂就話唔驚，「首先我睇呢套劇本好吸引我，我相信唔會有咁嘅情況出現。」