【任噏影評．原諒他77次】維繫感情唔好靠小氣簿 原諒太多變老奉
提到近年港產愛情電影，大家一定會諗起葉念琛一系列嘅公式電影，一係就《志明與春嬌》系列。上星期又上咗套，就係改篇自李敏同名小說的《原諒他77次》，其實77次只不過係一個數字，拍拖點會真係計足77次就分手先得㗎。一開頭我真係覺得阿Sa飾演嘅Eva好「港女」，郁下就鬧Adam(周柏豪飾)兼記錄在案，睇到有啲想撕爛本小氣簿，但最後我覺得Eva其實一啲都唔港女。
學戲中阿Sa話： 「人生，為真愛付出過，才不枉此生。」呢句雖然好old school，但起碼成班睇到班女觀眾勁buy先。讀法律嘅Eva同Adam呢對由大學已經一齊嘅情侶，女嘅就順理成章做律師，男嘅就為父母壓力先讀法律，畢業之後做一陣律師就辭職，要女朋友好似阿媽咁踢下佢先識搵工，講真邊有女仔唔想男朋友腳踏實地打份工，我都要為自己計畫下將來㗎嘛，你咁樣真係令到我好無安全感囉。當自己有返咁上下年紀，拍拖到一定地步，適婚年齡又快到，最怕愛情變感情，尤其身邊嗰位好似長唔大咁，同佢講結婚一定唔會肯，生小朋友更加係遙不可及嘅事。港女係恨嫁但又驚嫁錯，見到男朋友同自己屋企人一見面就狗咬狗骨瘋狂鬧交，自己夾住係中間做磨心，想佢哋修補關係真係難過登天，完全唔敢想像將來男友變做佢哋女婿嘅情景。
講到生日禮物就火，我認為最緊要係有心思係唔hea嘅都算，但Adam用咗接近成皮嘢買1TB嘅雲端服務送俾女朋友做生日禮物，1TB究竟送俾嗰女仔有咩用呢？用嚟download韓劇？(創意嘅嘢我識條鐵咩)。以上種種行為應該可以兩個字黎形容—「幼稚」，而Eva都只係發下老脾呻下就算，因為佢咁做都係想為Adam好，至少呢啲係可以原諒嘅範圍。
愛情無分對錯，始終事實是殘酷的，性格唔啱就係唔啱，分手只不過係遲早嘅事。雖然女仔嗰心係好想無限寬恕對方嚟維繫段感情，但只得自己付出，話唔攰係假嘅，因為原諒得多就會變習慣，人哋會當你「老奉」。希望睇完呢部戲係嘅你，唔好真係搵本小氣簿嚟記錄男友得罪自己瑣碎事嘅過程啦。