【學是學非】馮盈盈想拍古裝劇：我比唐嫣青澀啲
2016年港姐冠軍馮盈盈(Crystal)早前在Instagram(IG)上載了一張古裝照，內文表示自大陸劇集《錦繡未央》播出之後，一直有人說她長得像劇中女主角未央（唐嫣飾），就連Crystal媽媽都認為她們相似！該文一出，已經引來大批網民紛紛留言指二人樣貌相似，還說在Crystal選港姐的時候已經覺得。
正所謂人有相似，有人同自己差唔多樣其實唔出奇。Crystal在接受《香港01》訪問時表示很早已經有人將她與唐嫣相提並論，她說：「其實第一次聽到我似唐嫣係第一次港姐面試嗰陣，張相放咗上網之後都有唔少人講似，我嗰陣知唐嫣係邊個，但就無特別去對比同留意。直到之前TVB播《錦繡未央》，晚晚都會見到唐嫣，而我自己都會睇未央呢個角色，其實首先係由身邊人講先，好多朋友或者我阿媽會話有啲角度我都幾似佢。其實睇返啲相都覺得有幾成似，尤其係眼同埋個笑容，我發現我同佢影相嗰陣都唔鍾意露齒笑，可能嗰吓個神態都有少少似。（有人話你靚過唐嫣喎？）咁又真係太過獎喇，我作為女仔睇佢都覺得佢五官好精緻，眼大大鼻高高咀細細瓜子臉。我覺得如果要分我地嘅唔同，應該係我仲係比較新人青澀啲，唐嫣影相嗰陣每個角度都好精緻，好有經驗，但係我啲相就睇得出我係新人好青澀。不過聽到有人拎我個名同唐嫣比較已經好開心，仲邊敢諗我會靚過佢。」其實她們兩個各自有自己的美，的確唔需要強加比較。
既然外貌上有相似之處，那麼Crystal覺得自己可唔可以駕馭未央這個角色呢？她說：「我都有追《錦繡未央》，故事入面，未央一開始係少女，直到做到太后，睇得出佢係一個好聰明嘅人，可以化解到危機。我覺得呢……雖然我都唔係好蠢，但係如果我要控制呢啲非常有智慧嘅角色我應該仲未得，我個人都仲係傻傻地。同埋我知唐嫣係中央戲劇學院出身，受過好耐嘅演技訓練，我先仲係新人，雖然都上緊唔少演技班，但係仲需要多啲時間先可以純熟多啲。雖然出嚟嘅效果都未必夠唐嫣咁有吸染力，因為最後段未央同佢愛人分別嗰個位真係感動到我爭啲喊出嚟，佢真係做得好好，雖然我個樣同佢有幾分似，不過嗰個神態、神情真係要多啲時間浸。」明白自己哪一方樣有所不足，敢於承認自己的弱點，再向自己的弱點加以強化的確是值得讚揚。
那麼如果有機會挑戰角色，佢會想揀邊個呢？原來是另一套近期TVB播放的大陸劇集：「我反而覺得《射鵰英雄傳》入面由李一桐飾演嘅黃蓉我會比較想演，雖然我同李一桐個樣唔太似，但係劇入面黃蓉嘅神態同動作表情，我好多朋友都話我平時講嘢方式、搞笑嗰方便都好似黃蓉。仲有人會叫我扮黃蓉講嘢，例如『靖哥哥，蓉兒好擔心你呀，你去咗邊姐？』呢啲，我覺得呢個角色都幾活潑幾得意，如果有機會可以試，我都想試吓嘅，哈哈！其實我一直都好想拍古裝劇，雖然而家都未有機會，但之前都有場合有機會著古裝，好多人都會留言話我適合古裝扮相。可能因為我身型比較瘦削，所以會有啲似古代瘦弱美人嘅感覺喇哈哈！其實我上演技班嗰陣都俾人話過我講對白時好有古裝嘅感覺，反而講時裝對白就會俾人話我似古裝，搞到時裝劇都變成古裝嘅感覺，今年七月我就要開拍《果欄中的江湖大嫂》，希望可以搣甩陣古裝味喇！」其實古典美人係可以專注發展，想當年向海嵐做娘娘做到皆知巷聞，就連拍廣告都要做返娘娘，相當Crystal可以向這個方向考慮一下。