【陽光檸檬茶】林慕德為演唱會抽水？ 「我想為楊楚營伸冤」
撰文：溫菁莉
出版：更新：
3月份陽光檸檬茶推出復刻版，勾起不少人青澀歲月回憶。早前在facebook撰寫專欄的博客游大東，幾經辛苦查證下搵出廣告歌原唱者是楊楚營（Cindy）。但其後突變羅生門事件，因為曾參加第五屆新秀的盧昭明指自己才是原唱者，到底原唱者係楊楚營抑或是盧昭明。歌曲作曲者林慕德今午於灣仔出席將於8月舉行的《林慕德 & Friends Many Happy Returns 演唱會2017》記招，他就好肯定話，「我記得係楊楚營，一定係佢啦！」
林慕德指估不到多年之後會有人舊事重提，「我不知道是否hi-c（檸檬茶公司）那邊有打手，但我記得唱這首歌的人是我簽了，我好想捧她但忽然間過身，陽光檸檬茶是她的其中一首作品。」對於當年有份錄製廣告歌的錄音師兼混音師朱偉文（Raymond）指出，其實原唱是盧昭明，而林慕德就有這樣的睇法，「或者其中有個version是盧昭明唱過，因為當時我們要sell幾個人給客戶聽，但唱得最好一定是Cindy！」其後續道，「當年為陽光檸檬茶製作數十首歌曲，其中是有盧昭明去唱，但最終播出我敢肯定一定不是她唱。」
問到點解會咁記得？他透露當時有幫首歌做手腳，「因為佢有些地方走音，我對走音係完全頂唔順，所以之後有幫過佢調較返把聲。雖然件事過咗好耐，但我好記得。」對於有網友指林慕德為宣傳8月舉行的演唱會而舊事重提，有抽水之嫌，他表示不介意，「無乜所謂，因為我大把歌，檸檬茶只不過是其中一首。我覺得我講了這個故事出來，佢咁慘，分分鐘非命嚟嘅我覺得咋，我真係想為佢伸冤，其他人搵其他嘢嚟講就佢嘅事。」