麥明詩玩交友App好小心：如果知我係藝人唔會約出嚟
認識朋友，有很多方法，交友App就是其中一種。麥明詩之前透露有用過「Coffee Meets Bagel Free Dating 」，認識不同類型的朋友。問到有冇試過用交友App約朋友出嚟？佢就話：「有，得一個。都係見到有共同朋友，再向朋友了解下這個人才會安心約佢出嚟，網絡交友真的要好謹慎，所以我都會好小心。」麥明詩話用App識人，都不想對方知道她是藝人，會盡量避談，就算認得出她是誰時，對方有意再深入了解，她都不會應約，非常精明。
麥明詩講起自己玩交友App，並不是一般溝仔，她解釋：「做藝人認識的圈子可能都是圍繞住娛樂圈，識下不同類型的人，或者他們分享的東西都會inspire到自己。加上咁少嘅資訊去認識一個人，某程度上都係幫自己增加分析能力，從一啲details去了解佢，知道佢什麼性格。」
據知交友App玩法，就係男方send like示好，都未必即刻有得傾偈，要撳下profile了解一番，OK才按一按Accept，才能展開對話。由於可挑選的材料有限，只能睇相考慮。麥明詩就話睇相的條件，就是：「盡量自然、唔造作。自拍照、企喺部車隔籬，或者曬肌都唔係幾好。陽光呀，鍾意戶外活動，笑容OK，其實都已經唔錯。」
成功互相連結之後，就要打開話題匣子，那怎樣的開場白，才會傾到落去？麥明詩表示：「當然不會是hi，how are you喇。或者是有細心睇下個profile，嘗試了解我的興趣，例如我去過哪裏，問下我當地係點呀之類。若然問我天氣有幾熱嘅話，咁只能叫佢帶多支水喇。」即是話，從這些細緻位了解一下對方，讓對方感受到不是hea，更重要的是不要太chur，相處舒服就OK喇。
講起交友App，麥明詩自與林作變返做朋友之後，一直都有不少狂蜂浪蝶埋身，先有劍橋同學、藥房太子爺Thomas Chong；樂視籃球評述員大隻仔張存華，其後又有陽光男余德丞，雖然麥明詩表示同他們只是朋友，冇乜嘢冇意思，但近來就被周刊發現她與西裝男去四季酒店high tea密斟，一傾就傾了兩個鐘，更指對方是以交友App認識。《香港01》再訪問麥明詩，她就表示莫明其妙：「不知何解就這樣上到封面，對方是財務顧問，自己對投資方面有興趣，但又零概念，於是就約出來傾下，吸收下專業意見咁囉，去four season食tea咋嘛。（但周刊話個朋友是交友app度識喎。）佢點知我用交App識先？佢hack過我部手機？」間接否認這單新聞。