馮寶寶爆去年獲邀拍戲出演80歲阿婆　十分抗拒：對住塊鏡都唔開胃

久未露面的馮寶寶昨晚（13/1）現身西九文化區戲曲中心出席新《梁祝》粵劇場。馮寶寶受訪時透露剛從檳城返港，一連3日出席電影資料館所舉辦的座談會，與觀眾近距離互動，相當滿足：「其實我都好掛住香港，都想得閒返嚟，但因為機票太貴，咁所以就少啲返嚟，由我選擇過去馬來西亞檳城生活，都係半退休狀態。不過而家都好方便，可以用視像同朋友傾偈見吓面。」

被問到有否想復出拍戲？馮寶寶表示：「其實舊年係有人搵過我拍戲，但我就推咗唔拍。（咩原因唔拍？）因為要我扮老人家，講真唔可以要我扮成80歲嘅老人家㗎。如果到我真係演，到我對住塊鏡嘅自己，都會唔開胃啦，咁所以能夠可以在青春一啲嘅日子，都想畀吓自己。（如果片酬高，又拍唔拍？）咁又唔同，哈哈！你真係叻明我意思，（最緊要誠意！）咁即係話，你嘅價錢都要有啲誠意啲啦。」