鄭嘉穎為「嘥時間」言論解畫　抱歉為馬國明增添煩惱

鄭嘉穎早前以湊仔為由及發表「嘥時間」言論，解釋缺席馬國明海外婚禮，令兩人傳不和。鄭嘉穎今日（14日）與網球港將王康傑現身網球活動時，對於有關傳聞作出回應：「我係無講過嘥字，因為嘥係浪費，我都唔夠時間又點嘥呢？咁所以我都估唔到當日做嘅回應會出咗咁多想像唔到嘅版本，我都有同馬明講唔好意思，我仲見到佢幫我澄清，結過婚都知好多瑣碎嘢，佢仲要出嚟幫我澄清，我增添咗佢好多煩惱。」

鄭嘉穎表示自己因為講嘢太簡潔又欠缺解釋，令馬明增添煩惱而感到抱歉，他又指早在不和傳聞出現前，已同馬明解釋未能出席婚禮，並之後會與對方食飯補祝。「因為我唔覺得需要同其他人解釋嘛，係我哋兩個人之間嘅事，我哋拆掂咗無諗過要同其他人解釋。」鄭嘉穎又謂已在改善說話嘅技巧，避免再被誤會

問到如果分擔照顧小朋友工作，他反問記者：「你有無小朋友？無呀，咁你遲啲咪知囉，其實攰就⋯⋯需要一定體力，我唔係話辛苦，但會唔會攰呢？一定會，因為佢哋體力係無限，但開心嘅。3個而家都係最需要人照顧嘅年紀，去到小學可能會free啲。」