《踩過界》愛奇藝6．19率先睇　香港觀眾繼續捱倉底

自從《不懂撒嬌的女人》後，王浩信的暖男形象深入民心，人氣急升，不少靚太OL都想繼續看到他的演出，所以對另一齣由他擔正的劇集，講述失明律師伸張正義的《踩過界》萬分期待，原來愛奇藝在6月19日率先有得睇，咦，咁咪即是本地觀眾冇得睇住，無綫拍的港劇，反而內地觀眾優先有得睇，這是什麼玩法？公平咩？

無綫播出十年前的倉底劇《蘭花劫》，早已被網民鬧至體無完膚，包括劇本過時，低清畫面，CG效果衰過小畫家，咁都算，諗住捱多一個星期，等套劇大結局，但緊接播出的卻是《賭城群英會》，即是那齣王晶食老本之作，雖然由馬國明、佘詩曼擔正，但內容圍繞兩代人在賭壇上的恩恩怨怨，相當Old School，再看看其他演員，竟然是陳百祥、謝賢、劉兆銘，這個陣容完全是《千王之王》及《千王群英會》的翻版，仿如向37年前的舊作致敬，莫非無綫高層認為新一代未看過《千王之王》，所以拍乜都冇所謂。

其實無綫一直錢字掛帥，但以前還會顧及觀眾感受，間中都有一兩齣較高質素的作品留客，但自從推出myTV SUPER後，重頭劇往往先放在收費的myTV SUPER播放，像《巾幗梟雄之謀血天》，觀眾就等到頸都長，才能在翡翠台看到，而且更被刪減了不少精采情節，毫無疑問是焗觀眾轉投myTV SUPER的懷抱。

除此之外，《不懂撒嬌的女人》劇情亦有不少篇幅是傾向褒內地貶本土，原來是因為該劇早想賣給內地的愛奇藝，打算同步播出，所以全劇充滿內地劇的味道，只是最後愛奇藝選擇了《踩過界》，但《不》劇始終未有優待內地觀眾，現時《踩過界》卻在內地搶先播出，香港觀眾卻只能繼續看倉底劇、爛膠劇，觀眾流失收視慘淡，只能說是自作自受。