【愛‧回家】Venus鄺潔楹好討人歡心 樣靚有學識兼單身真荀盤
《愛·回家之開心速遞》前晚發生一幕阿媽棒打鴛鴦的情節，話說做阿媽的滕麗名希望兒子將重點放在學業上，所以出計令到周嘉洛唔可以同鄺潔楹(Judy)一齊去澳門玩。作為虎媽的滕麗名真係好老土，個仔都已經讀大學仲唔放心佢去拍拖，不過現今香港地的確有很多這類型的虎媽存在，彷彿跟現今香港的情況背道而馳，重歸舊年代的思想。
Judy自從拍完《3日2夜》之後便得到不少網民留意，點解？因為拍親呢個節目都會三點式上陣浸溫泉，點會無人留意呀？其實佢本來是TVB娛樂新聞台主播，被節目組睇中搵佢拍《3日2夜》，憑住十分特出的身材而被廣泛討論，繼而入埋劇組開劇。92年出生的她現在才24歲，樣甜身材正，仲喺美國讀完大學回流返嚟，各方面條件都真係頂呱呱，相信即使遇到虎媽奶奶都完全無問題。
在劇中被棒打鴛鴦的Judy在接受《香港01》訪問時都好認同不讓求學時期的孩子拍拖是一種好老土的想法，她說：「其實我媽咪都會關心我識咩朋友呀，同咩男仔來往呀，我覺得都係出自關心。我自己就唔反對讀書時候拍拖，不過我就會同啲大個啲嘅人分享，但未必係父母，可能係哥哥呀表哥表姐嗰啲咁，因為自己有個大四年既哥哥，大家都幾close，佢亦都時不時關心我。從佢地口中可能會得到一啲佢地嘅經歷，會講你知讀書拍拖會係點，由佢地講讀書唔好太專注拍拖可能會有效啲。」
在劇中，Judy面對虎媽滕麗名都無任何反抗，只有乖乖地服從。那麼在現實中如果遇到男朋友的媽媽是虎媽又點算呢？她說：「咁我印象中我拍拖嗰陣男方嘅家長都幾鍾意我架，哈哈！因為我都算係一個有禮貌同埋識得哄長輩開心嘅女仔。如果真係遇到虎媽，其實都真係幾難入手，所以就更加要用個心去應付，要知道佢個心諗乜嘢。最緊要就係細心啲，例如天氣轉涼就叫佢著多件事，又或者行街見到佢鍾意食嘅食物會買俾佢。」人又靚又識哄人，估唔到Judy而家仲係單身，真係城中荀盤。