亞洲超星團｜丁子朗打扮妝容惹負評　孔德賢撐好友：咩評論都會有

孔德賢（Danny）今日（22/11）現身將軍澳出席《愛心曲奇暖萬家》愛心探訪活動。對於好友丁子朗參加《亞洲超星團》因金髮Look及妝容太白，備受網民評擊。Danny受訪時表示：「其實我同丁子朗相識咗7年咁耐，可以話係一齊長大。見到佢為咗參加呢個比賽，佢係落咗好多苦工，睇到佢連續跳咗3分鐘嘅跳舞片，都唔知道佢排咗幾多個夜晚。就好似我之前喺台慶扭兩扭嘅舞，我都排咗成個月，所以我真心覺得佢好犀利，佢意志真係好堅定。」

Danny續說：「其實喺網絡世界咩評論都會有，同埋負評個個都會有，但當佢能夠突破到自己嘅舒適圈嘅時候，當然係需要好大勇氣，而嗰啲評論就可以唔使理，最緊要係佢意志要堅定。就好似佢同我講，話佢自己入行年歲要開始變，唔想錯失機會令自己後悔。（你唔學佢參賽？）雖然我同佢同年，同一個月生日，我都老啦，其實我自己係想做一個成熟嘅演員，因為明白到依家係需要一啲年青而且又要演技成熟嘅演員，所以我係想專注喺呢方面進發。」