無綫挖走對台《啪啪聲》監製 BigBigChannel加甜玩直播
TVB繼「myTV SUPER」、「See See TVB」等網上平台之後，最近大推直播手機app「BigBigChannel」，晚晚睇電視都見到TVB藝人狂sell此全新平台，不過此平台突竟搞邊科、有乜節目則仍然未清楚。
其實「BigBigChannel」已經招兵買馬，準備7月主攻網絡觀眾，並已撬走ViuTV成人向節目《啪啪聲太好聽》的監製鄭寶榮，為「BigBigChannel」打頭陣，睇嚟新channel將有點成人味道。鄭寶榮曾在TVB兼職製作節目《娛樂大搜查》，但只做了幾個月便離職，期後於NowTV任節目監製，至ViuTV開台後《Come on baby》、《Seven》、《No money no talk》和梁梓禧及阿旦主持的《啪啪聲太好聽》都由他監製，以性為題材的《啪啪聲太好聽》更是ViuTV最受歡迎和最有話題性的節目之一。據知《啪》已決定轉監製，節目形式亦因而有更改。
鄭寶榮接受《香港01》電話訪問時承認將加入「BigBigChannel」：「我係辭職走嘅，完成埋手頭上《啪啪聲》之後7月就過「BigBigChannel」，有冇加人工就唔好講喇！《啪啪聲》會有第二組監製handle。」被撬過檔是否代表「BigBigChannel」會製作以性為題材的節目，監製就話：「會有啲敏感嘢，但要睇TVB取向啦，我剩係知呢個channel冇咁多嘢受廣管局規管，可以自由好多，雖然ViuTV都好大自由度，但每個電視台都有啲嘢唔會做，ViuTV都唔做政治敏感嘢啦！」
「BigBigChannel」去年底開始在網上招募對旅遊、飲食、美容及親子有心得的KOL，咁究竟有咩睇？無綫公共關係科回覆話係免費手機直播app，到時TVB藝人和網絡紅人都會直播和上載影片，觀眾可即時留言，講到底其實同facebook、ig差唔多。但既然挖走友台監製，一定要其他殺手鐧，6月23日下載體驗版就知。